अमेरिकी राष्ट्रपति–निर्वाचित जो बाइडेनले पद सम्हालेको एक सय दिनमा १० करोड नागरिकलाई खोप दिने लक्ष्य रहेको बताएका छन् ।  बाइडेनले आफ्नो कार्यकालको सुरुमा नै महामारी अन्त्य गर्न नसकेपनि आफूले कोभिड–१९ को बाटो भने मोड्ने बाचा पनि गरेका छन् ।

२० जनवरीमा कार्यकाल सुरु गर्दा उनको साथमा हुने आफ्नो स्वास्थ्य कार्यदललाई परिचय गराउँदै बाइडेनले अमेरिकी जनतालाई ‘१०० दिनसम्म मास्क लगाउन’ आग्रह गरे ।

मंगलबार नै अमेरिकी नियामक निकायले फाइजर/बायोएनटेकको खोप ९५ प्रतिशतसम्म सुरक्षित र प्रभावकारी रहेको पुष्टि गरेको छ । यसबाट खोप आपतकालीन प्रयोगका लागि स्वीकृति दिने बाटो खुला भएको छ ।

खाद्य तथा औषधि निकाय एफडीएले सुरक्षाका कारण फाइजर/बायोएनटेकको खोपलाई स्वीकृति दिन रोक्नुपर्ने कुनै कारण नभेटिएको जनाएको छ ।

बेलायतमा गत साता नै स्वीकृति पाएको यो खोप आम मानिसमा लगाउन थालिसकिएको छ । खोपबारे निर्णय गर्न एफडीएले बिहीबार औपचारिक बैठक आयोजना गरेको छ । अमेरिका र यूके दुवै देशलाई उत्पादकहरूले खोपको सुरक्षा र प्रभावकारिताबारे जानकारी गराएका थिए ।

यो खोपबाट पूर्ण सुरक्षाका लागि दुईवटै डोज आवश्यक पर्ने एफडीएले जनाएको छ । पहिलो डोजले निकै गम्भीर घटनामा ८९ प्रतिशत सुरक्षा दिने एफडीएले जनाएको छ ।

एफडीएले यो खोप लिनेले धेरै व्यहोर्ने समस्या भनेको दुःखाई, खोप लगाइने भाग पाखुरामा रातो डाम र सुन्निने समस्याहरू देखिन सक्ने जनाएको छ । त्यसपछि छोटो समयका लागि थकान, टाउको दुख्ने र मासु दुख्ने समस्या समेत देखिन सक्छ ।

तर यी सामान्य प्रभाव बाहेक अध्ययन गरिएको बेला खोप लगाइएका र नियन्त्रित समूहका व्यक्तिहरूबिचमा स्वास्थ्य अवस्थामा कुनै उल्लेख्य फरक देखिएको थिएन । गर्भवती महिला र १६ वर्ष मुनिका बालबालिकाहरूमा यसको जाँच नगरिएकाले त्यो उमेर समूहमा त्यसले अझै स्वीकृति पाउने काम बाँकी छ ।

राष्ट्रपति ट्रम्पले अमेरिकामा निर्मित खोपमा अमेरिकी नागरिकहरूलाई पहिलो प्राथमिकता दिइने काम सुनिश्चित गर्नका लागि एउटा कार्यकारी आदेशमा हस्ताक्षर गरेका छन् ।