विदेशमा रहेका चन्द्रागिरीबासीको लगत संकलन  - News Birat

विदेशमा रहेका चन्द्रागिरीबासीको लगत संकलन 

न्यूज विराट

काठमाडौं, १७ जेठ-चन्द्रागिरि नगरपालिकाले विदेशमा रहेका चन्द्रागिरीका बासिन्दाको लगत संकलन कार्य सुरू गरेको छ । काठमाडौं उपत्यका प्रवेशको मुख्यद्धारमा रहेको चन्द्रागिरि नगरपालिकाले बन्दाबन्दी खुलेसँगै छिमेकी मुलुक भारत र विभिन्न देशबाट आउने व्यक्तिबाट कोरोना संक्रमण फैलन सक्ने कुरालाई मध्यनजर राख्दै लगत संकलन कार्य सुरू गरेको हो ।

नगरपालिकाका प्रवक्ता हरिभक्त महर्जनले विदेशबाट आउने व्यक्तिबाट कोरोना स.क्रमण फैलन नदिन लगत सङ्कलन कार्य शुरु गरिएको जानकारी दिए । ‘विदेशबाट आउने व्यक्तिको तथ्यांक संकलन गरी क्वारेन्टिनको उचित व्यवस्थापन गर्नका लागि लगत संकलन सुरू गरेका हौँ’ उनले भने ।

अर्थमन्त्री डा. युवराज खतिवडाले बिहीबार संघीय संसद्का दुवै सदनमा आर्थिक वर्ष २०७७/७८ को बजेट वक्तव्य प्रस्तुत गर्दै विदेशमा रहेका स्वदेश फर्कन चाहने नेपालीलाई सहजीकरण गर्ने बताएका थिए ।

सरकारले स्वेदश फर्कन चाहने व्यक्तिको नामथर, स्थायी ठेगाना, स्वदेश फर्कन चाहने नागरिकको बसोबास रहेको देशको ठेगाना, स्वदेश फर्कन चाहने नागरिकको नेपालमा रहेका आफन्तको नामथर र सम्पर्क नम्बर उपलब्ध गराउन सबै स्थानीय तहलाई अनुरोधसमेत गरेको छ ।

चन्द्रागिरिले हाल नगर अस्पताल, मनमोहन अस्पताल र विभिन्न विद्यालयमा १ सय शय्याको क्वारेन्टाइन निर्माण गरेको छ । चन्द्रागिरिले नगरपालिकाभित्र कोरोना सङ्क्रमितको संख्या बढेसँगै सशस्त्र प्रहरी बल अस्पताल बलम्बुको सहकार्यमा कोरोना संक्रमितको उपचार गर्दै आएको छ । चन्द्रागिरिमा ५ जना कोरोना संक्रमण भेटिए पनि सबै व्यक्ति निको भएर घर फर्किसकेका छन् । रासस 

मा प्रकाशित

यसमा तपाईको मत:

© Copyright 2017 - 2021 Newsbirat pvt ltd. All Rights Reserved.

Design / Developed by codebundles