विराटनगर, २८ भदौ–सुनसरीको धरानस्थित वीपी कोइराला स्वास्थ्य विज्ञान प्रतिष्ठानमा थप एक पुरुषको कोरोना संत्रज्ञmमणबाट मृत्यु भएको छ । प्रतिष्ठानको कोभिड–१९ अस्पतालमा उपचाररत मोरङको विराटनगर–१२ का ७० वर्षिय पुरुषको संक्रमणबाट मृत्यु भएको हो । मृतक पुरुषमा गत भदौ १६ गते प्रादेशिक जनस्वास्थ्य ल्याबमा गरिएको परिक्षणमा कोरोना पोजेटिभ देखिएको थियो ।

कोरोना पोजेटिभ देखिएपछि मृतक पुरुष विराटनगरस्थित म्याक्स अस्पतालबाट रेफर भई वीपी प्रतिष्ठानको कोभिड अस्पतालमा १७ भदौमा भर्ना भएका थिए । उनलाई ज्वरो, खोकी र स्वास प्रश्वासमा समस्या भएपछि म्याक्स अस्पतालबाट रेफर गरिएको थियो ।

कोभिड अस्पतालमा उपचाररत पुरुषको आइतबार २.१८ बजे मृत्यु भएको वीपी कोइराला स्वास्थ्य विज्ञान प्रतिष्ठानका प्रवक्ता डा. निदेश सापकोटाले जानकारी दिए । उनले मृतक पुरुष उच्च रक्तचापको दिर्घरोगी रहेको बताए ।

उनका अनुसार मृतक पुरुषको शव नियम अनुसार व्यवस्थापन भइरहेको छ । यो सहित प्रदेश १ मा मृत्यु हुनेको संख्या ४८ पुगेको छ । जसमध्ये १२ जना प्रदेश १ बाहिरका हुन् । आइतबार मृत्यु भएका पुरुषसँगै विराटनगरमा मात्र कोरोना संक्रमणबाट मृत्यु हुनेको संख्या १८ पुगेको छ ।