विराटनगर । गएरातीदेखि परेको अबिरल बर्षाले विराटनगर डुवानमा परेको छ । पानीको निकास थुनिंदा विराटनगरको दक्षिण क्षेत्र डुवानमा परेको हो ।

सडकमा पानी जमेर आवतजावतसमेत समस्या उत्पन्न भएको छ । लगातारको वर्षाको कारण केसेलिया खोलाको बाढी विराटनगर १२ को बखरी, दरैया, बराहाटोल, मलौना, सिमराहीका सयौं घर डुवानमा परेको १२ का वडा सदस्य कुशेश्वर राजवंशीले बताए । घर डुवानमा परि विस्थापित भएका परिवारका सदस्यहरु विराटनगर १२ मा रहेको सामुदायिक भवन र बखरी स्कूलमा बसेका छन् ।

कसेलिया खोलामा आएको बाढी ‘ओभरफ्लो’ भएर विराटनगरका विभिन्न स्थानमा पसेको थियो । प्रहरीका अनुसार बाढीले विराटनगरको उत्तरी, दक्षिणी र पश्चिमी भेगमा बढी वितण्डा मच्चाइरहेको छ । खोलाको बाढी वस्तीमा पसेपछि विराटनगर १२ बखरीका सर्वसाधारणबीच भागदौड मच्चिएको थियो ।

लगातारको वर्षाका कारण खोलाहरुमा आएको बाढीले विराटनगरका ४, ५, ६, ८, १२, १५, १६, १७, १८ का केहि घर डुवानमा परेको मोरङ प्रहरीका प्रबक्ता डिएसपी ज्ञानेन्द्र बहादुर बस्नेतले जानकारी दिए । प्रहरी बाढीपीडितको उद्धारमा व्यस्त रहेका कारण बाढीले कति क्षति पु¥यायो भन्ने कुराको यतिन विवरण प्राप्त हुन सकेको छैन ।

बाढीपीडितको उद्धारका लागि प्रभावित क्षेत्रमा सशस्त्र प्रहरी र नेपाल प्रहरी खटिएका छन् । विराटनगर स्थित शनिमन्दिर चोक, मुनाल पथ, आयल निगम पुर्व,पिचरालगायतका क्षेत्रको अधिकांश सडक पानीले भरिएका छन् ।