विराटनगर, २० भदौ–समुदायस्तरमा कोरोना संक्रमण फैलिएको मोरङको रंगेली नगरपालिकामा कोरोना शंक्रमण शुन्यमा पुगेको छ । जनता क्याम्पसको आइसोलेसन केन्द्रमा रहेका बाँकी तीन जनालेसमेत शनिबार कोरोना जितेर घर फकिएपछि रंगेलीमा कोरोना संक्रमण शुन्यमा पुगेको हो ।

नगरपालिकाले संक्रमितको कन्ट्रयाक्ट टे«ेसिङबाट तिव्ररुपमा परिक्षण गरेर संक्रमण पुष्टि भएका संक्रमितको उचित व्यवस्थान गरेपछि रंगेली कोरोना मुक्त भएको जनाएको छ ।

नगरपालिका स्वास्थ्य शाखा प्रमुख भुपेन्द्र मण्डलका अनुसार रंगेलीमा कुल एक सय २२ जनामा कोरोना पुष्टि भएकोमा समुदायस्तरमा मात्र एक सय नौ जनामा कोरोना संक्रमण पुष्टि भएको थियो । अन्य १३ जना भारतबाट आएर नगरका क्वारेन्टाइनमा बसेका व्यक्तिहरु रहेका थिए । उनिहरु प्रदेश सरकारले स्थापना गरेको कोभिड–१९ उपचार केन्द्रमा उपचार पश्चात कोरोना मुक्त भएर घर फर्किएका थिए ।

समुदायस्तरमा संक्रमण पुष्टि भएका मध्ये रंगेली–८ का ४५ वर्षिय पुरुषको कोरोना संक्रमणबाट मृत्यु भएको थियो । अन्य सवै जना उपचार पछि निको भएर घर फर्किएका छन् ।

रंगेली नगरपालिकामा गत साउन १९ गते पहिलो पटक समुदायस्तरमा एकैदिन २२ जनामा कोरोना संक्रमण पुष्टि भएको थियो । जसमध्ये १४ जना एकै परिवारका रहेका थिए । सो परिवारका एक पुरुषको मस्तिष्क घातबाट मृत्यु भएपछि मृत्यु संस्कारमा सहभागि हुन भारतको दिल्लीबाट आएकी मृतककी छोरीबाट सवैमा कोरोना संक्रमण फैलिएको थियो ।

समुदायस्तरमा संक्रमण पुष्टि भएकामध्ये ९ जनाको सुनसरीको धरानस्थित वीपी कोइराला स्वास्थ्य विज्ञान प्रतिष्ठानको कोभिड–१९ उपचार केन्द्र र १३ जनाको पूर्वाञ्चल विश्वविद्यालय गोठगाउँ आइसोलेसन केन्द्रबाट उपचार भएको थियो भने ८७ जना रंगेलीस्थित जनता क्याम्पसको आइसोलेसन केन्द्रबाट स्वास्यलाभ गरि कोरोना मुक्त भएर घर फर्किएपछि यतिबेला रंंगेली संक्रमण मुक्त भएको स्वास्थ्य शाखा प्रमुख मण्डलले जानकारी दिए ।

कोरोना संक्रमित दैनिक थपिँदैजाँदा प्रदेश सरकारले स्थापना गरेका कोभिड–१९ उपचार केन्द्रमा बेड अभाव हुनथालेपछि नगरपालिकाले संक्रमित राख्न रंगेलीकै जनता क्याम्पसमा गत साउन २५ गतेदेखि एक सय बेड क्षमताको आइसोलेसन केन्द्र सञ्चालनमा ल्याएको थियो ।

सो आइसोलन केन्द्रमा राखिएका सवै जनाले उपचारपश्चात कोरोना जितेर घर फर्किएपछि आइसोलेसन केन्द्र अहिले खाली भएको छ भने सिंगो रंगेली नगरपालिका कोरोना मुक्त भएको नगरप्रमुख दिलिप बगडियाले जानकारी दिए ।

‘शनिबार ३ जना बाँकी संक्रमित पनि डिस्चार्ज हुनुभएको छ । अब रंगेली कोरोना मुक्त भएको छ । हाम्रो एकल पयासबाट मात्र सम्भव थिएन । कोरोना भाइरसको संक्रमण रोकथाम तथा नियन्त्रणमा रंगेली अस्पतालका स्वाथ्यकर्मीको महत्वपूर्ण भूमिका छ । संगसँगै रंगेलीका सवै जनप्रतिनिधि, उद्योगी, व्यवसायी, नगरवासी, सञ्चारकर्मी, सुरक्षाकर्मी, स्वास्थ्यकर्मीलगायत सवैको महत्वपूर्ण भूमिका र सहयोगले रंगेलीमा नियन्त्रण गर्न सफल भएका छौँ । यसका लागि सवैलाई धन्यवाद दिन चाहन्छु ।’ उनले भने,‘अब रंगेलीमा कोरोना संक्रमण फैलिन नदिन उच्च सतर्कता अपनाएका छौँ । रंगेलीमा बाहिरबाट सरुवा भइ आएका एक दर्जन प्रहरीलाई अनिवार्य क्वारेन्टाइनमा बस्न लगाएका छौँ । बाहिरबाट आउने व्यक्तिहरुका कारण संक्रमणको जोखिम रहेकाले उच्च निगरानी गर्नेछौँ ।’