एजेन्सी, ७ भदौ-भारतको झारखण्डका कृषिमन्त्री बादल पत्रलेख कोरोना संक्रमित भएका छन् । स्वास्थ्यमन्त्री कोरोना संक्रमित भएपछि उनले पनि कोरोना परीक्षण गराउँदा रिपोर्ट पोजेटिभ आएको हो ।

झारखण्डका हेमन्त सोरेन सरकारको ११ सदस्यीय मन्त्रिपरिषदमा उनी कोरोना संक्रमित हुने तेस्रो मन्त्री हुन् । मुख्यमन्त्री कार्यालयको निर्देशनपछि बाँकी मन्त्री पनि होम क्वारेन्टाइनमा बसेका छन् ।

मुख्यमन्त्रीसहित केही मन्त्रीको जाँच गराउन बाँकी रहेको छ । मुख्यमन्त्रीको सोमबारमात्रै कोरोना परीक्षण गर्ने तयारी छ । स्वास्थ्यमन्त्री कोरोना संक्रमित भएपछि मन्त्रिपरिषदका सबै सदस्यको कोरोना परीक्षण गराउन निर्देशन दिइएको थियो ।

एक मन्त्रीबाहेक सबै मन्त्री क्याबिनेट बैठकमा सहभागी भएका थिए । जसमा कोरोना संक्रमण देखिएका स्वास्थ्यमन्त्री बन्ना गुप्ता पनि सहभागी थिए ।

सो बैठकपछि स्वास्थ्यमन्त्रीको कोरोना परीक्षणको पोजेटिभ रिपोर्ट आएको थियो । भारतको झारखण्डमा मात्रै २९ हजारभन्दा बढीमा कोरोना संक्रमण देखिएको छ भने ३१० जनाको मृत्यु भइसकेको छ ।