विराटनगर, ३१ असार-प्रदेश १ मा समुदायस्तरमा पनि कोरोना परीक्षण गरिने भएको छ । प्रदेश १ मा कोरोना संक्रमण क्वारेन्टाइनमा बसेका मात्रको परीक्षण गरिएकोमा अब समुदायमा संक्रमण भएनभएको परीक्षण गर्न लागिउको हो ।

प्रदेश सरकारले नमुनाका रूपमा समुदायस्तरमा पनि परीक्षण गर्ने तयारी गरेको सामाजिक विकासमन्त्री जीवन घिमिरेले बताए । उनले भने, ‘क्वारेन्टिनमा मात्र हैन समुदायमा पनि नमुनाका रूपमा परीक्षण गर्न आवश्यक देखियो ।’

कोरोना उपचार केन्द्र र क्वारेन्टाइनबाट डिस्चार्ज भएकाहरूको परिवार र आसपासका स्थानहरूको छनोट गरेर नमूनाका रूपमा परीक्षण गर्ने मन्त्री घिमिरेले बताए । पहिलो चरणमा सुरक्षाकर्मीको परीक्षण गरिएको उनले बताए ।

कोरोना संक्रमणको नियन्त्रण तथा उपचारका लागि अग्रभागमा रहेर काम गरिरहेका ३ वटै सुरक्षा निकायका १ हजार ५ सयको परीक्षण गरिएको मन्त्री घिमिरेले बताए । सुरक्षाकर्मीको परीक्षणमा कसैलाई पनि संक्रमण नदेखिएको उनले बताए । सुरक्षाकर्मी पछि स्वास्थ्यकर्मीको परीक्षणको तयारी सुरु गरिएको उनले बताए ।

‘निजी अस्पताल सञ्चालकको संगठन अफिनसँगको सहकार्यमा स्वास्थ्यकर्मीको परीक्षण गरिने छ’ उनले भने । स्वास्थ्यकर्मीको परीक्षणपछि समुदायस्तरमा परीक्षण गरिने मन्त्री घिमिरेले बताए ।

परीक्षणको दायरा बढाउनका लागि माग बढिरहेकाले समुदायस्तरमा पनि परीक्षण गर्न लागिएको उनको भनाइ छ । मन्त्री घिमिरेले भने, ‘क्वारेन्टाईनमा रहेका, कन्ट्याक्ट ट्रेसिङका आधारमा  र कोरोना उपचार केन्द्रमा भर्ना भएकाको नेगेटिभ रिपोर्ट नआउँदासम्म परीक्षण गर्ने काम भइरहेको छ ।’

प्रदेश १ मा कोरोना संक्रमणभन्दा कोरोनामुक्त भएर घर फर्कनेको संख्या बढ्दो क्रममा रहेको मन्त्री घिमिरेले बताए । उनले भने, ‘प्रदेश १ को अवस्था भयाभह छैन ।’  भारतलगायतका तेश्रो मुलकबाट आउनेहरूमा मात्र संक्रमण देखिएको मन्त्री घिमिरेले बताए ।