विराटनगर, असार २८–केहिदिनयता परेको लगातारको बर्षापछि विराटनगरको दक्षिणीक्षेत्र जलमग्न भएको छ । केशलिया खोलाले धार परिर्वतनगरि बस्ती प्रवेश गरेपछि सो क्षेत्र जलमग्न भएको हो । लगाताको बर्षापछि केशलिया खोलाको जलस्तर बढ्दै गएर बस्ती प्रवेश गरेपछि विराटनगरको दक्षिणपश्चिमी वडाहरु जलमग्न भएको छ ।

विराटनगर–१२ बखरीको शिवमन्दिर टोल,सिमराही बस्ती,दरैया,मल्हनवा र ऋषिदेव टोल सहितका क्षेत्रहरु जलमग्न भएको छ । बखरीको शिवमन्दिर टोल देखी १ नम्बर प्रदेश प्रहरी कार्यालय पछाडि रहेको दरैयाबस्तीको अधिकांश घरहरुमा बाढीको पानी प्रवेश गरेको छ । त्यसक्षेत्रको सडकहरुमा समेत १ फिट देखी ३ फिटसम्म खोलाको पानी बगिरहेको छ ।

घरभित्रै बाढीको पानी प्रवेश गरेपछि कतिपय स्थानियबासी बस्तुभाउ,बालबच्चा र सरसामान सहित नगरक्षेत्रका अन्य सुरक्षित स्थानतर्फ लागेका छन भने कतिपय बासिन्दा आफ्नै घरको छतहरुमा बसेर बाढीको अवस्था नियाली रहेका छन । दरैया बस्तीका राकेश कुमार साहले घरभित्रै खोलाको बाढी प्रवेश गरेपछि आफु परिवारसहित आफ्न्तकोमा आश्रय लिएको बताए ।

घरआँगन र सडकहरुबाटै बाढीको पानी बग्न थालेपछि सर्वसाधारणलाई सामानसहित सुरक्षितस्थानमा जान समेत समस्या भइरहेको छ । आईतबार बिहान ७ बजेपछि नजिकै रहेको केशलिया खोला र फुफरी खोलाको जलस्तर बढदै गएर बाढीले बस्ती प्रवेश गरेको हो । जसका कारण खोला किनारमा बसोबास गर्दै आएका विपन्न तथा सुकुम्बासी ऋषिदेव समुदायका मानिसहरु सबभन्दा बढी प्रभावित भएका छन् ।

सो समुदायका प्रायजसो सबै घरहरुमा बाढीको पानी प्रवेश गरेको छ । स्थिति भयावह बन्दै गएपछि नेपाल प्रहरी र शसस्त्र प्रहरीको टोलीले ऋषिदेव समुदायका ३० परिवारलाई उद्धार गरेको छ । उद्धार गरिएका परिवारहरुलाई स्थानिय बखरी आधारभुत विद्यालयमा राखिएको छ । पानीको उचित निकास नहुनु र जथाभावीरुपमा खोलाको डिल तथा किनारका माटोहरु कटान गरेर बेच्ने गरिएका कारण बर्षेनी खोलाले बस्ती प्रवेश गर्ने गरेको स्थानिय नरेश लाभले बताए ।

उता विराटनगर १२ का वडाध्यक्ष हिरालाल कामतले वडाको पश्चिमी सिमाना भएर बग्ने केशलिया र फुफरी खोलामा स्थायी तटबन्ध नगरेसम्म बाढीको समस्या समाधान नहुने दाबी गरे । तटबन्ध गर्नसके मात्र विराटनगर ११,१२ र ६ नम्बर वडालाई सुरक्षित गर्न सकिने उनको भनाई छ ।