काठमाडौं, १८ असार-केही दिनदेखि कलाकार तथा निर्देशक दीपाश्री निरौला निकै विवादित बनिरहेकी छन् । राजेश हमालको ‘महानायक’ उपाधिमा प्रश्न गरेपछि उनी विवादमा मुछिएकी थिइन् ।

दीपाश्रीको यस अभिव्यक्तिपछि राजेशका शुभचिन्तकहरू निकै आक्रोशित बनेका थिए । केही चलचित्र हिट हुँदैमा राजेशले चलचित्र क्षेत्रमा पुर्‍याएको योगदानलाई भुलेको भन्दै दीपाश्रीलाई गालीको वर्षा भएको थियो ।

निकै आलोचित बनेपछि दीपाश्री निरौलाले राजेशका शुभचिन्तकहरूसँग माफी मागेकी छन् । सामाजिक सञ्जालमा लामो स्टाटस लेख्दै दीपाले राजेश दाइमाथि प्रश्न गर्ने आफ्नो हैसियत नभएको उल्लेख गरेकी छन् ।

दीपाले लेखेकी छन्, ‘भगवान् रामले पनि सीता मातालाई जंगल पठाएको कुराको ठूलो विरोध भयो । स्वयम् भगवान राम पनि आलोचनाका पात्र बन्न पुगे । कृष्ण भगवानमाथि पनि बेलाबेलामा औँला उठाइयो । मैले चलचित्र क्षेत्रको महानायक भएपछि चलचित्र क्षेत्रमा परेको विषम परिस्थितिमा एउटा अभिभावकको भूमिका निर्वाह गरेर, आफूलाई वर्षाैंदेखि सहयोग गरेका प्राविधिकहरूलाई परेको पिरमर्कामा सहयोगी किन हुन सक्नु भएन ? भन्ने आशयले यो विषयमा बोलेकी हुँ । के प्रधानमन्त्री, के महानायक, के कलाकार, अथवा के भगवान्, सबैसँग गुनासो गर्न पाइन्छ । एउटा उच्च सम्मानमा बसेको मान्छेबाट केही आशा हुन्छ नै, मेरो आशय त्यति मात्र हो ।’

दीपाश्रीले राजेश हमाललाई सुपरस्टार होइन भन्ने हैसियत आफ्नो नभएको र आगामी दिनमा पनि नहुने उल्लेख गरेकी छन् । उनले थपेकी छन्, ‘मेरो पहिलो चलचित्रको नायक हो उहाँ । उहाँलाई महानायकको रूपमा मुन्द्रेको कमेडी क्लबमा अत्यन्त सम्मान गरेकी छु । हेर्न सक्नुहुन्छ !’

आफू दुःख गरेर आएको कलाकार भएको र अहिले घमण्ड नगर्ने दीपाको भनाइ छ । ‘म यो क्षेत्रमा ३० वर्षदेखि छु, टुप्पोबाट पलाएको पनि छैन’, दीपाश्री लेख्छिन्, ‘हमालज्यू सुपरस्टार हुनुहुन्थ्यो, हुनुहुन्छ र पछिसम्म रहिरहनुहुनेछ ।’

दीपाले चलचित्र क्षेत्रलाई आपत पर्दा सहयोगी मन नदेखाएकोमा भने प्रश्न खडा गरेकी छन् । कलाकार भएका कारण आफूलाई आएका असभ्य र पच्नै नसक्ने आरोपहरू पनि सामान्य रूपमा लिएको दीपाले बताएकी छन् । असभ्य गाली गर्नेहरूलाई दीपाले प्रश्न गरेकी छन्, ‘घरमा तपाईंका दिदीबहिनीले पनि यस्तै एउटा भुल गर्दा यसै गरेर अपशब्द प्रयोग गरेर गाली गर्नुहुन्छ ?’