काठमाडाैं, १९ जेठ-प्रमुख प्रतिपक्षी दल नेपाली कांग्रेसले रुकुम घटनाको छानबिनका लागि संसदीय समिति गठन नभए कडा कदम चाल्ने चेतावनी दिएको छ । रुकुम पश्चिमको चौरजहारीमा भएको घटनामा संयुक्त राष्ट्रसंघले समेत निष्पक्ष छानबिनको माग गरिरहेको उल्लेख गर्दै कांग्रेसले संसदीय समितिबाट छानबिन गर्न माग गरेको हो ।

प्रतिनिधिसभामा सांसद मानबहादुर विश्वकर्माले घटनाको निष्पक्ष छानबिनका लागि दलित सांसदको नेतृत्वमा संसदीय समिति तत्काल गठन गर्न माग गरे ।

उनले भने, ‘घटनाको निष्पक्ष छानबिनका लागि दलित सांसदको नेतृत्वमा संसदीय समिति तत्काल गठन होस् । यही माग हामी राख्छौं । यो भन्दा कडा कदम हामीलाई चाल्न बाध्य नपारीयोस् ।’

प्रतिनिधिसभा बैठक सुरू हुने बित्तिकै कांग्रेस सांसदहरूले उठेर विरोध जनाएका थिए । त्यसलगत्तै सांसद विश्वकर्माले आफ्नो धारणा राखेका थिए । घटना गम्भीर भए पनि गृहमन्त्रीले साधारण कर्मचारीको अध्यक्षतामा बनाएको छानबिन समितिले न्याय दिन नसक्ने उनले बताए ।

‘यति ठूलो घटना घटिसकेपछि अहिले गृहमन्त्रीले साधारण कर्मचारीको अध्यक्षतामा छानबिन समिति गठन गर्नुभएको छ । त्यो छानबिन समितिले न्याय दिन सक्दैन । र, हामीलाई उक्त समिति मान्य पनि छैन् । यस हत्याकाण्डलाई फितलो बनाउनका लागि जाजरकोटमा आर्थिक चलखेल भइराखेको रिपोर्ट पनि पाएका छौँ’, उनले भने ।

पश्चिम रुकुमको चौरजहारीमा आफ्नी प्रेमिकाले बाेलाएपछि उनकाे घर पुगेका जाजरकोटका नवराव विकसहित उनका ५ जना साथीको पनि मृत्यु भएको थियो । गाउँलेहरूको आक्रमणबाट उनीहरूको मृत्यु भएको बताइएकाे छ ।