विराटनगर, असार असार १५–प्रदेश १ का सामाजिक विकास मन्त्री जीवन घिमिरेले सामुदायिक विद्यालयलाई श्रोत सम्पन्न बनाउनका लागि समुदाय परिचालन आवस्यक भएको बताएका छन् । समुदायलाई परिचालन गर्न सके विद्यालयका लागि आवस्यक सामाग्री जुटाउन सहज हुने उनले बताए ।

तीनै तहको सरकारको श्रोतको सीमा हुने भएकाले एकै स्थानमा मात्र बढी खर्च गर्न नसकीने मन्त्री घिमिरेले बताए । झापाको दमक नगरपालिकाले विद्यालय शैक्षिक गुणस्तर सुधार संवन्धिको अनलाईन कार्यक्रममा आज मन्त्री घिमिरेले सो कुरा बताएका हुन् । समुदाय परिचालन गर्न सके शैक्षिक गुणस्तर सुधारका लागि आवस्यक पर्ने सामाग्री जुटाउनका लागि समस्या नहुने उनले बताए ।

विद्यालयमा समुदाय परिचालन गर्नका लागि सामाजिक विकास मन्त्रालयले पुर्व विद्यार्थी समाज गठनको अवधारणा ल्याएको बताए । ‘ पुर्व विद्यार्थी विभिन्न तह र स्थानमा हुन्छन्, उनीहरुलाई परिचालन गर्न सके आवस्यक सामाग्री जुटाउन सहज हुन्छ ।’ उनले भने ।

मन्त्री घिमिरेले विद्यालय शिक्षाको शैक्षिक गुणस्तर सुधारका लागि विद्यालय मितेरी सम्बन्ध कार्यक्रम, इ–एजुकेशनको व्यवस्थापन, पुर्व विद्यार्थी समाज गठन र परिचालन, आमा समुह गठन र परिचालनको काम भईरहेको बताए ।

प्रविधिमैत्री विद्यालय हुनका लागि शिक्षक पनि दक्ष हुनुपर्नेमा उनको जोड छ । शिक्षक दक्ष भए मात्रै विद्यार्थीले दक्षता आर्जन गर्न सक्ने उनले बताए । प्रविधि मैत्री विद्यालय निर्माण कार्यमा दमक नगरपालिकाले कार्य शुरु गरेकोमा उनले धन्यवाद दिए ।

प्रदेश १ ले शुरु गरेको अभियानले अन्य प्रदेशमा पनि सिकाईको आधार तयार भएको मन्त्री घिमिरेले बताए । विद्यालय शिक्षाको शैक्षिक गुणस्तर सुधार कार्यक्रम संवन्धि सामाजिक विकास मन्त्रालयले गरेको काम र उपलब्धीबारे मन्त्रालयका तर्फबाट हिक्मत वस्नेतले प्रस्तुती गरेका थिए ।