काठमाडौं, १३ असार-कृषि तथा पशुपन्छी विकासमन्त्री घनश्याम भुसालले ४० वर्षयता कृषि क्षेत्रलाई विगार्ने काम मात्रै भएको बताएका छन् ।एसोसिएशन आफ नेपाली एग्रिकल्चरल जर्नलिष्टस् (आनाज) द्वारा राष्ट्रिय धान दिवशको अवसरमा आयोजित अन्तरक्रिया कार्यक्रममा मन्त्री भुसालले ३०/४० वर्षयता मेहनत गरेर नै कृषि क्षेत्रलाई ध्वस्त पार्ने काम भएको बताए । उनले कृषि विकासका लागि भाषण गर्ने, ठेक्का पट्टा गर्ने, विभिन्न प्रोजेक्टहरू ल्याएर विगार्ने काम गरिएको बताए ।

‘हामीले त ३०/४० वर्ष भयो बर्बाद पार्न थालेको । हाम्रा साना दुःखले बार्दद पारेको होइन । हामीले बहुत मेहनतले बर्बाद परेका छौँ । हाम्रो कृषि व्यवस्थालाई हामीले भाषण गरेका छौँ, हामीले अनेक प्रयत्नहरू गरेका छौँ, ठेक्कापट्टा गरेका छौँ, प्रोजेक्टहरू गरेका छौँ । के-के गर्‍यौँ गर्‍यौँ । यो कृषि व्यवस्था विगार्नका लागि’ उनले भने ।

लामो समयसम्म बिगार्दै आएको कृषि व्यवस्थालाई सुधार्न अझै केही समय लाग्ने मन्त्री भुसालले बताए । ३०/४० वर्षदेखि बिग्रदै आएको कृषि ३ वर्षभित्रमा सुधार्न चुनौतीपूर्ण रहेको समेत उनले बताए ।