जनकपुर, ७ जेठ-प्रदेश २ मा कोरोना संक्रमितको चाप बढ्न थालेपछि प्रदेश सरकारले ३ सय ५ को आइसोलेसन बेड थप्ने निर्णय गरेको छ । मुख्यमन्त्री लालबाबु राउतको नेतृत्वमा रहेको कोरोना भाइरस रोकथाम तथा नियन्त्रण प्रदेश स्तरीय निर्देशन एवं समन्वय समितिको मंगलबार सम्पन्न बैठकले कोरोना संक्रमितको संख्या बढ्ने सम्भावनालाई दृष्टिगत गर्दै प्रदेशको विभिन्न स्थानमा ३ सय ५ आइसोलेसन बेड थप्ने निर्णय गरेको हो ।

बैठकले हाल सञ्ंचालनमा रहेको कोरोना अस्पतालको आइसोलेसन बेडका अतिरिक्त सिरहा अस्पतालमा ५० बेड, सिरहा अस्पतालको मातहतमा रहने गरी महेन्द्र गेनाइ अस्पतालमा ३० बेड, गौर अस्पतालको मातहतमा गौर नरसिंह इन्स्टिच्युटमा ३० बेड थप गर्ने निर्णय गरेको सरकारका प्रवक्ता एवम् आन्तरिक मामिला तथा कानुनमन्त्री ज्ञानेन्द्र यादवले जानकारी दिए ।

उनका अनुसार पोखरिया अस्पताल पर्सामा २५ बेड, भारदह अस्पताल सप्तरीमा ५० बेड, मलंगवा अस्पतालको मातहतमा अन्त अल्पमाई रामनारायणयादव नर्सिङ कलेजमा २५ बेड, गजेन्द्र नारायण सिंह अस्पताल राजविराजको मातहतमा साइकृष्ण मेडिकलमा ५० बेड र बर्दीवास अस्पतालमा ५० बेड थप गर्ने निर्णय पनि भएको छ ।