आगलागी पीडितलाई युवा संघ रतुवामाईको सहयोग - News Birat

आगलागी पीडितलाई युवा संघ रतुवामाईको सहयोग

न्यूज विराट

विराटनगर, ५ फागुन । मोरङको रतुवामाई नगरपालिका–५ गोविन्दपुरका आगलागीबाट पीडीत परिवारलाई युवा संघ रतुवामाई नगर कमिटीले सहयोग गरेको छ ।

मंगलबार राति साढे सात बजेतिर स्थानीय नुर महम्मदको घरमा आगलागी भएको थियो । आगलागीबाट पीडीत परिवारलाई युवा संघ रतुवामाईले खाद्यान्न, लत्ताकपडासहित राहत वितरण गरेको हो ।

नुर महम्मदको घरमा आगलागी हुँदा घरमा भएको सम्पूर्ण खाद्यान्न र लत्ताकपडा जलेर नष्ट भएको थियो । घटनाको जानकारी पाएलगत्तै युवां संघले पीडीत परिवारका लागि सहयोग जुटाउने अभियान सुरु गरेको थियो ।

पीडीत परिवारलाई सहयोग जुटाउन युवां संघ रतुवामाई नगर कमिटी अध्यक्ष राम कार्की (आदेश) ले मोरङ इन्चार्ज नवीन पौडेल र संयोजक मनोज राईलाई घटनाबारे जानकारी गराउँदै सहयोगको अपिल गरेका थिए ।

उनीहरुको समन्वयमा जिल्लाका १७ वटै पालिका कमिटीबाट सहयोग संकलन गरि पीडीत परिवारलाई खाद्यान्न, लत्ताकपडासहित विभिन्न राहत सामाग्री वितरण गरिएको युवा संघ रतुवामाई नगर कमिटी अध्यक्ष कार्कीले जानकारी दिए ।

पीडीत परिवारलाई राहतस्वरुप एक महिना पुग्ने चामल, दाल, नुन, तेल, सोयाबिन, माक्स, साबुन, सरफ, सिरक, ढसना, तन्ना, सुइटर, टुथपेस्ट, ब्रसलगायतका सामाग्री वितरण गरिएको अध्यक्ष कार्कीले बताए ।

समस्याबारे बुझ्न पीडीत परिवारको घर पुगेका नेकपा (एमाले) मोरङका जिल्ला कमिटी सदस्य दुर्गा विष्टले जुनसुकै समयमा पनि एमाले र सो पार्टीका सवै जनसंगठनहरु देश र जनताको पक्षमा रहेको बताउँदै जनताको पीडामा मल्हम लगाउन सँधै तत्पर रहेको बताए ।

मा प्रकाशित

यसमा तपाईको मत:

© Copyright 2017 - 2022 Newsbirat pvt ltd. All Rights Reserved.

Design / Developed by codebundles