काठमाडाैं, ६ जेठ-प्रधानमन्त्री केपी शर्मा ओलीले रोजगारी गुमाएका परिवारलाई राहतका प्याकेज देखाउने कुरा होइन भन्दै त्यो रहरको विषय पनि नभएको बताएका छन् ।

सरकारको आगामी आर्थिक वर्षको नीति तथा कार्यक्रमका सन्दर्भमा उठेका प्रश्नहरूको संसदमा जवाफ दिँदै प्रधानमन्त्री ओलीले करोडौँ मानिस रोजगारविहीन, आम्दानीबाट वञ्चित हुने गम्भीर स्थिति आएको बताए । उनीहरूको व्यवस्था गर्ने सरकारले विभिन्न किसिमका योजना बनाइराखेको संसदमा जानकारी गराएका छन् ।

प्रधानमन्त्री ओलीले बेरोजगार भएका, रोजगारी गुमेकाहरूलाई सम्भव भएसम्म रोजगारीका अवसरहरू उपलब्ध गराउनुपर्ने बताएका छन् । त्यस्ता व्यक्तिको कमाइबाट आम्दानी सुनिश्चित गर्ने नै दिगो बाटो हुने बताए । यसले देशको अर्थतन्त्रलाई कमजोर हुन पनि नदिने भएका कारण सरकार त्यही बाटोमा जान खोजिरहेको प्रधानमन्त्री ओलीले बताए ।

उनले नेपालको कृषिक्षेत्रमा तथा अरु क्षेत्रमा उत्पादन कसरी बढाउने, उपभोग्य वस्तुको उपलब्धता कसरी बढाउने भनेर सरकार प्रयासरत रहेको बताए । उनले दाल, चामल, नुनजस्ता कुरा बाँच्नका लागि नभई नहुने भन्दै ती न्यूनतम कुरा कसरी उपलब्ध गराउने भनेर गम्भीर हुन जरुरी रहेको बताए ।