भोलि संविधान संशोधन विधेयक पारित गर्ने तयारी, सबै दल संशोधनको पक्षमा - News Birat

भोलि संविधान संशोधन विधेयक पारित गर्ने तयारी, सबै दल संशोधनको पक्षमा

न्यूज विराट

काठमाडौं, ३० जेठ-भोलि संसदमा नेपालको संविधान (दोस्रो संशोधन) विधेयक, २०७७ लाई पारित गरियोस् भनेर प्रस्ताव प्रस्तुत हुनेछ । उक्त प्रस्ताव कानुन, न्याय तथा संसदीय मामिला मन्त्री शिवमाय तुम्वाहाङफेले प्रस्तुत गर्ने छन् ।

त्यसअघि उक्त विधेयकमाथि दफावार छलफलका लागि कानुनमन्त्रीले प्रस्तुत गर्ने प्रतिनिधिसभाको सम्भावित कार्यसूची रहेको छ । दफावार छलफलपछि मन्त्री तुम्वाहङफेले संशोधन विधेयक पारित गरियोस भनेर पेस गर्ने कार्यक्रम तय भएको संघीय संसद सचिवालयले जनाएको छ । उक्त प्रस्तावको पक्षमा सत्ता पक्ष र विपक्षले पनि मतदान गर्ने सहमति जुटेको छ ।

सरकारले ७ जेठमा भारतले अतिक्रमण गरेको भूमि लिम्पियाधुरा, लिपुलेक र कालापानी सहितको भूभाग समेटेर नक्सा सार्वजनिक गरेको छ । संविधानको अनुसूची ३ मा रहेको निसान छापमा नयाँ नक्सा अध्यावधिक गर्नका लागि संसदबाट संविधान संशोधन गरिँदै छ ।

नेपाली कांग्रेसले सरकारले संविधान संशोधन गर्न ल्याएको प्रस्तावको पक्षमा मतदान गर्ने निर्णय १७ जेठमा बसेको केन्द्रीय कार्यसमितिको बैठकले गरेको छ । बैठकले संसदीय दललाई संविधान संशोधनको पक्षमा मतदान गर्न निर्देशन दिएको छ । कांग्रेसले संविधान संशोधन प्रस्तावको विषयमा छलफल गर्न पहिला पधाधिकारी बैठक बोलाएको थियो । पदाधिकारीले केन्द्रीय कार्यसमितिलाई जिम्मा दिएको थियो ।

मा प्रकाशित

यसमा तपाईको मत:

© Copyright 2017 - 2021 Newsbirat pvt ltd. All Rights Reserved.

Design / Developed by codebundles