विराटनगर, जेठ ५–विराटनगरका औषधि ब्यवसायी देवीप्रसाद दुलालको उनकै श्रीमतीको योजनामा हत्या भएको खुलेको छ । जिल्ला प्रहरी कार्यालय मोरङले उक्त घटनामा मृतक दुलालकी श्रीमतिसहित घटनामा संलग्न थप दुईजनालाई नियन्त्रणमा लिएपछि सो खुलासा भएको हो ।

प्रहरीले घटनामा लहान नगरपालिका १० का २१ बर्षिय ब्रम्हदेव साह, इटहरी उपमहानगरपालिका १२ का २० वर्षीय सोनु साह र मृतककी श्रीमती विराटनगर–१० बस्ने मीना श्रेष्ठ दुलाललाई नियन्त्रणमा लिएको छ ।

जिल्ला प्रहरी कार्यालयले सोमबार अपराहन्न स्काइपमार्फत आयोजना गरेको पत्रकार सम्मेलनमा बोल्दै मोरङ प्रहरी प्रमुख प्रहरी उपरिक्षक विश्व अधिकारीले मृतककी श्रीमती मिना श्रेष्ठ दुलालको योजनामा ब्रम्हदेव साह र सोनु साहको सहयोगले दुलालको हत्या गरिएको जानकारी दिए । ‘अनुसन्धानबाट श्रीमान–श्रीमतीबीच राम्रो सम्बन्ध नरहेको पाइएको छ ।’ उनले भने,‘श्रीमानसँग बदला लिने उद्देश्यसहित हत्या भएको प्रारम्भीक अनुसन्धानबाट खुलेको छ ।’

घटना विवरण अनुसार जेठ ३ गते साढे १० बजे राती श्रीमति मीनाको योजना अनुसार बिराटनगर–१० स्थित मधुमाराचोक पुगेका बम्हदेव र सोनुसहितले प्लास्टिकको डोरीले दुलालको घाँटीमा बेरेर तथा कुटपीट गरेर हत्या गरेको बताइएको छ ।

योजनाअनुसार हत्यापछि मात्र उनलाई उपचारका लागि अस्पतालतर्फ लगिएको अनुसन्धानमा खुलेको छ । इटहरी–१२ घर भएका मृतक दुलालले विराटनगरमा देवी पाथिभरा फार्मेसीका नामले औषधि पसल चलाउँदै आएका थिए । १० वर्षअघि प्रेम विवाह गरेका दुलालका ८ वर्षीय छोरा छन् ।