जनकपुर, ३१ वैशाख-वीरगञ्जको नारायणी अस्पतालको आइसोलेसन कक्षबाट २ जना कोरोना संक्रमित भागेका छन् । उनीहरूको खोजीकार्य भइरहेको प्रहरीले जनाएको छ । पर्साका प्रहरी उपरीक्षक गंगा पन्तले नारायणी अस्पतालबाट २ जना संक्रमित भागेको खबर आएको र खोजी कार्य तीब्र पारिएको बताइन् ।

यता, अस्पतालमा ठाउँ खाली नहुँदा वीरगन्जमा मंगलबार राति संक्रमण पुष्टि भएका १८ जना संक्रमित घरमै अलपत्र परेका छन् । वीरगन्ज महानगरपालिका-३ छपकैयामा एकै परिवारका ७ जनासहित १८ जनामा मंलबार राति संक्रमण भेटिएको थियो ।

संक्रमण पुष्टि भएलगत्तै संक्रमितलाई उपचारका लागि कोबिड-१९ अस्पतालमा लगेर भर्ना गर्नुपर्छ । तर, राति सवा १० बजे संक्रमणको पुष्टि भएका १८ जनालाई भने अहिलेसम्म अस्पताल लगिएको छैन । जसका कारण उनीहरू आफ्नै घरमा अलपत्र परेका हुन् ।

संक्रमितलाई अस्पताल नलगी घरमै राख्दा त्यसले अन्य व्यक्तिहरूमा संक्रमण फैलने जोखिम देखिएको स्वास्थ्यकर्मीले बताएका छन् । संक्रमितहरूको उपचार हुँदै आएको नारायणी अस्पतालको आइशोलेशन वार्डमा थप संक्रमित राख्ने बेड नभएर उनीहरू अस्पताल नलगिएको हो ।

अस्पतालका मेडिकल सुपरिटेन्डेन्ट डा. मदन उपाध्यायले अस्पतालमा बनाइएको आइसोलेसन वार्ड खाली नरहेका कारण १८ जना संक्रमितलाई नल्याइएको बताए । ’आइसोलेसन वार्डको क्षमता ७० शैयाको मात्र छ’, उनले भने, ‘पहिलेदेखि नै ६९ जना संक्रमित ल्याएर राखिसकिएको छ । अब थप संक्रमित राख्ने ठाउँ नै छैन, हामीले थप संक्रमित अब राख्न सक्दैनौँ ।’

सुरुमा ५ शैयाको आइसोलेसन वार्ड बनाइएको र पछि संक्रमित थपिँदै जाँदा २५, ५० हुँदै ७० शैयाको बनाइएको तर, अब थप बेड राख्ने ठाँउ नै नभएको उनले बताए । अस्पतालको आइसियू, प्रसूति, मेडिकल, सर्जिकल, अर्थो गरी सबै वार्डमा बेड व्यवस्थापन गरी ६९ जना संक्रमित राखिएको उपाध्यायले जानकारी दिए ।