विराटनगर । भारत तस्करी हुन लागेको गाँजासहित प्रहरीले कार बरामद गरेको छ । सशस्त्र प्रहरी बल बोर्डर आउट पोस्ट (बिओपी) भुटहाले नेपाल भारत सीमा क्षेत्रदेखि तस्करीको ६५ केजी गाँजा बरामद गरेको हो ।

गाँजा लोड गरिएको बा १६ च ६०५४ नम्बरको रातो कार र एउटा मोटरसाइक पनि बरामद गरिएको सशस्त्र प्रहरी बल मोरङका एसपी विश्व बन्धु खड्काले जानकारी दिए । दुई वटा बोरामा लोड गरिएको अवस्थामा गाँजा बरामद गरेको हो । बिओपी भुटहाका सशस्त्र प्रहरी निरीक्षक दिपक दाहाल नेतृत्वको टोलीले सोमबार राती विराटनगर १८ दमादिगी बस्तीबाट गाँजा बरामद गरेको हो । प्रहरीले विशेष सुचनाको आधारमा गाँजा बरामद गरेको छ । ‘प्रहरीलाई देखेपछि गाँजा तस्करीमा संलग्न फरार भए । फरार भएकाहरुको खोजी कार्य तिव्र बनाएको छ,’ एसपी ख्डकाले भने ।
थप कारवाहीको लागि बरामद गरिएको गाँजा र सवारी साधान इलाका प्रहरी कार्यालय रानी विराटनगरमा राखिएको छ । यसअघि पनि बिओपी भुटाले तस्करीको ठूलो परिमाणको गाँजा बरामद गरेको थियो । केही दिन अगाडी भारत तस्करी हुन लागेको १७६ केजी गाँजा जहदा गाउँपालिका २ बाट बरामद गरेको थियो ।
तस्करी गरेर भारत पु¥याउनकै लागि धनकुटालगायत पहाडी जिल्लाहरुबाट झिकाएर गाँजा मोरङको दक्षिणी नाका प्रयोग गर्ने गरेको प्रहरीले पत्ता लगाएको छ । सीमावर्ती क्षेत्र नजिक भण्डारण गरिने गाँजा सुरक्षाकर्मीलाई छल्नासाथ सीमानाका हुँदै भारत कटाउने गरिएको हो ।