काठमाडौं, १९ वैशाख-नेपालमा कोरोना संक्रमितको संख्या ५९ पुगेको छ । आज बाँके र रुपन्देहीमा १/१ जनामा कोरोना संक्रमण देखिएसँगै नेपालमा कोरोना संक्रमितको संख्या ५९ पुगेको हो ।

रुपन्देही निवासी २५ वर्षीय पुरुष र र नेपालगंज बाँके निवासी ६० वर्षीय पुरुषमा कोरोना संक्रमण देखिएको स्वास्थ्य मन्त्रालयका सहप्रवक्ता डा समीरकुमार अधिकारीले बताए ।

‘हाल अध्यावधिक विवरणअनसार कोभिड-१९ पुष्टि भएको संख्या ५९ पुगेको छ । आज नयाँ पुष्टि भएको संख्या २ रहेको छ’ उनले भने ‘रुपन्देही निवासी २५ वर्षीय पुरुष र र नेपालगंज बाँके निवासी ६० वर्षीय पुरुष हुनुहुन्छ । उहाँहरू दुवैजनाको स्वास्थ्य अवस्था सामान्य छ र उहाँहरू स्वास्थ्यकर्मीको निगरानीमा हुनुहुन्छ ।’

एक बिरामी रुपन्देहीका बासिन्दा भए पनि दुवै जनाको भेरी प्रादेशिक अस्पतालको आइसोलेसनमा उपचार भइरहेको छ । उनीहरूमध्ये १ जनाको राष्ट्रिय जनस्वास्थ्य प्रयोगशाला र अर्काको नेपालगञ्‍जस्थित ल्याबमै गरिएको पीसीआर परीक्षणमा कोरोना देखिएको हो । दुईमध्ये १ जना विदेशबाट आएको खुलेको छ ।