एजेन्सी, पुस १–भारत उत्तर प्रदेशको बिजनोर जिल्लास्थित सीजेएम कोर्टमा न्यायाधीशकै अगाडि एक अभियुक्त मारिएका छन् । पेशीमा आएका हत्याका दुई अभियुक्तलाई केही व्यक्तिले गोली हानेका हुन् । दुईमध्ये एकको अदालतभित्रै मृत्यु भएको छ भने अर्का अभियुक्त भागेर बाँच्न सफल भएका छन् । यस क्रममा गोली लागेर दुई प्रहरी पनि घाइते भएका छन् । आक्रमणकारीलाई अदालत परिसरबाटै पक्राउ गरिएको छ । उनीहरूबारे थप अनुसन्धान भइरहेको प्रहरी अधिकारीलाई उधृत गर्दै बीबीसी हिन्दीले उल्लेख गरेको छ ।

यो पूरै घटना सीजेएम कोर्टमा मुद्दाको सुनुवाई चलिरहेका बेला भएको हो । सीजेएम योगश कुमार यो फाइरिङबाट बच्न सफल भए । बिजनोरका प्रहरी अधिकारीका अनुसार यसै वर्षको जुनमा नजीबाबादमा बीएसपी नेता एहसान र उनका भान्जाको गोली हानेर हत्या भएको थियो जसमा नजीबाबादकै शाहनवाज र जब्बारविरुद्ध मुद्दा दर्ता गरिएको थियो ।