काठमाडौं, १३ वैशाख-विश्वव्यापी महामारीको रुप लिएको कोरोना भाइरस (कोभिड–१९) बाट निको हुनेको संख्या ८ लाख नाघेको छ । कोरोना संक्रमणबाट मुक्त हुनेमा सबैभन्दा बढी संयुक्तराज्य अमेरिकाका मानिस रहेका छन् । त्यहाँ ९ लाख २५ हजार संक्रमितमध्ये १ लाख १० हजार बढी व्यक्ति निको भएका छन् ।

त्यस्तै, जर्मनीमा पनि कोरोना संक्रमणमुक्त हुनेको संख्या निरन्तर बढिरहेको छ । त्यहाँ झण्डै १ लाख १० हजार व्यक्ति उपचारपछि निको भएका छन् । जर्मनीमा संक्रमितको संख्या १ लाख ५६ हजार पुगेको छ ।

त्यस्तै, स्पेनमा ९२ हजार, चीनमा ७७ हजार, इरानमा साढे ६६ हजार, इटालीमा ६० हजार ४ सय, फ्रान्समा ४३ हजार, ब्राजिलमा २७ हजार, स्विट्जरल्याण्ड, टर्कीमा समान २१ हजार, क्यानाडामा साढे १५ हजार, अस्ट्रियामा ११ हजार, बेल्जियममा १० हजार, आयरल्याण्डमा ९ हजार, चिलीमा ६ हजार, दक्षिण कोरियामा ८ हजार ६ सय, मेक्सिको, पेरुमा ७–७ हजार, डेनमार्क, रसिया, अष्ट्रेलियामा समान ५ हजार व्यक्ति किनो भइसकेका छन् ।

दक्षिण एसियाका भारतमा ५ हजार ४ सय, पाकिस्तानमा झण्डै ३ हजार, बंगलादेशमा ११२, अफगानिस्तानमा १८८, श्रीलंकामा १०९, माल्दिभ्समा १६, नेपालमा ११ र भुटानमा ३ जना कोरोना मुक्त भइसकेका छन् । हालसम्म विश्वका २१० देश कोरोना संक्रमणबाट प्रभावित भएका छन् ।

शनिबार बिहानसम्म संक्रमितको संख्या २८ लाख ३१ हजार नाघेको छ । जसमध्ये ८ लाख ६ हजार व्यक्ति निको हुँदा १ लाख ९७ हजारले ज्यान गुमाएका छन् ।