कोरोना भाइरस संक्रमणपछि आर्थिक गतिविधि ठप्प भए पछि भारतको एयर इन्डियाले २ सय पाइलटसँगको सम्झौता रद्द गरेको छ ।विश्वभर कोरोना भाइरस संक्रमणका कारण आर्थिक गतिविधि ठप्प बनेको छ भने अझै मन्दी छाउने आँकलन भइरहेका बेला एयर इन्डियाका २ सय पाइलटले जागिर गुमाएका हुन् ।

यसरी हटाइएकामा सेवा निवृत्तपछि पनि सम्झौतामा काम गरिरहेका पाइलटहरू रहेको इकोनोमिक टाईम्सले उल्लेख गरेको छ । कोरोना भाइरसको महामारीका कारण एयर इन्डियाले १४ अप्रिलसम्मका सबै उडानहरू रद्द गरिसकेको छ ।

पछिल्लो केही सातादेखि अधिकांश विमान ‘ग्राउन्डेडको उडान बन्द भएपछि राजश्वमा समेत कमी आएको छ । एयर इन्डियाले अस्थायी रूपमा आफूसँग रहेका पाइलटहरूलाई हटाएको जनाएको छ ।

यस्तै, क्याबिन क्रूबाहेक सबै कर्मचारीको आगामी ३ महिनाको १० प्रतिशत भत्ता कटौतीसमेत गर्ने भएको छ । संयुक्त राष्ट्रसंघले विश्वमा २ करोड ५० लाख मानिसले कोरोना संकटका कारण रोजगारी गुमाउने अनुमान गरेको छ ।