पोखरा, १२ वैशाख-मणिपाल शिक्षण अस्पताल पोखरामा अध्ययनरत श्रीलंकाका विद्यार्थीलाई सरकारले स्वदेश फिर्ता लगेको छ ।विश्वब्यापी रूपमा कोरोना भाइरसको संक्रमण फैलिएपछि श्रीलंका सरकारले पोखराको मणिपालमा पढिरहेका ६४ जना विद्यार्थीलाई शुक्रबार फिर्ता लगेको हो ।

नेपालस्थित श्रीलंकाली दूतावासको पहलमा ६४ जना विद्यार्थीलाई काठमाण्डौं हुदै श्रीलंका पठाइएको कास्कीका सहायक जिल्ला अधिकारी श्रीनाथ पौडेलले बताए । ‘श्रीलंका सरकारको आग्रहमा पोखराबाट  विद्यार्थीलाई पठाइएको हो’ उनले भने। उनका अनुसार विद्यार्थीलाई काठमाण्डौं लगेर श्रीलंकन एयरमार्फत स्वदेश लगिएको हो ।