प्रदेश २ मा शान्ति-सुरक्षामा खटिएका प्रमुखको सरुवा, पदस्थापना, काज र खटनपटन गर्दा प्रदेश सरकारको सहमतिमा लिनुपर्ने भन्दै आन्तरिक मामिला तथा कानुन मन्त्रालयले संघीय सरकारलाई पत्र पठाएको छ ।

कोरोना भाइरस (कोभिड–१९) को महामारीको बेला सुरक्षा निकायका प्रमुखहरूलाई नचलाउन प्रदेश सरकारले पत्र नै लेखेको हो । कोभिड-१९ विरुद्धको लडाइँका लागि प्रदेशमा सञ्चालन तथा व्यवस्थापन भइरहेको प्रबर्द्धनात्मक, निरोधात्मक र उपचारात्मक अभियानमा सुरक्षा निकायको व्यापक सहयोग र सहकार्य रहेकाले गृह मन्त्रालय तथा अन्तर्गतका निकायबाट यसप्रकारको सरुवा नगर्न अनुरोध गरिएको छ ।

प्रदेश २ मा कार्यरत ३ डिआईजी, केही सीडीओ र एसपीको सरुवाको तयारी गृह मन्त्रालयले गरिरहेको बेला आन्तरिक मामिला तथा कानुन मन्त्रालयले यसप्रकारको पत्र पठाएको छ ।

‘डीआईजी, सीडीओ र एसपीलाई प्रदेश वा अन्तर्गतको जिल्लामा सरुवा, पदस्थापन, काज वा खटनपटन गर्दा सहमति लिन अनुरोध छ,’ प्रदेश सरकारले गृह मन्त्रालयलाई लेखेको पत्रमा उल्लेख छ ।