एजेन्सी, बैशाख ५-ब्राजिलमा एक परिवारको उत्सव त्यसबेला शोकमा बदलियो जब पार्टीमा सामेल भएका तीन जनाको मृत्यु भयो भने १० जनामा कोरोना संक्रमण देखियो ।

सायद एउटा जन्मदिनको पार्टीले यस्तो घटना निम्त्याउन सक्छ भन्ने कसैले पनि सोचेका थिएनन् । तर पार्टीमा संलग्न सबै सदस्य अब कोरोना संक्रमित बनेका छन् ।

ब्राजिलको साओ पाउलोमा एक जन्मदिनको पार्टीमा सामेल भएका २८ जनामध्ये तीन जनाको मृत्यु भएको छ भने अन्य सदस्यको जीवन खतरामा परेको छ ।

मृत्यु हुने तीन जना एकै परिवारका सदस्य हुन् । यद्यपि प्रशासनले भने एक जनाको मात्रै कोरोना भाइरस संक्रमणका कारण मृत्यु भएको जनाएको छ ।

१३ मार्चमा साओ पाउलोको इटापेर्सिया डे सेरा इलाकामा पार्टी भएको थियो । ब्राजिलको स्वास्थ्यमन्त्रालयका अनुसार सोही दिनसम्म पनि देशमा कोरोना भाइरसका ९८ संक्रमणका घटना पुष्टि भइसकेका थिए ।

ब्राजिलमा कोरोना भाइरस संक्रमणका करिब ६० प्रतिशत घटना साओ पाउलोमा पाइएका छन् । दुई करोडभन्दा बढी जनसंख्या रहेको यो सहर सबैभन्दा घना बस्ती भएको सहरमध्ये एक हो ।

यो घटनाको करिब ३ सातापछि ८ अप्रिलसम्म ब्राजिलमा कोरोना संक्रमितको संख्या १६ हजार भन्दा बडी भइसकेको थियो भने ८ सय भन्दा बढीको मृत्यु भइसकेको थियो ।

भेरा लुसियालाई महामारी ब्राजिलसम्म आएको र आफ्नो ५९औं जन्म दिनको पार्टी रद्द गर्ने सम्म सोचेका थिए । उनले भनिन्, ‘हाम्रो मनमा सन्देह थियो तर देशमा कोरोना संक्रमितको संख्या धेरै नभएकाले हामीले पार्टी गर्ने निधो गरेका थियौं ।’

भेरा लुसियाको जन्मदिनको पार्टीमा २८ जना सहभागी भएका थिए । यो पार्टीमा भेरा लुसियाका पति पाउलो भिएराका भाई र बहिनी सहभागी भएका थिए । पाउलो, उनका भाई क्लोभिस र बहिनी मारियाले भाउजुको पार्टी जमेर मनाएका थिए ।

तर त्यही उनीहरुको मृत्युको कारक बन्यो । पार्टीमा भेरा लुसियाकी बहिनी पनि सामेल भएकी थिइन् । लुसिया र पाउलोको भतिजा भतिजी पनि सहभागी थिए ।

पार्टीको केही दिनपछि आधाभन्दा बढी सहभागीमा रुघाखोकी, ज्वरो र श्वासप्रश्वासमा समस्या देखियो । यी सबै लक्षण कोरोना भाइरसका थिए । जसमध्ये केहीमा हल्का लक्षण देखिएको थियो ।

भेला लुसियाका पति पाउलो र उनका भाई र बहिनीको मृत्यु संक्रमणको लक्षण देखिएको एक सातामा भयो । मारियाको मृत्यु कोरोना भाइरसबाट भएको प्रशासनले पुष्टि गरेको छ ।

मारियाकी छोरी राफेलाले भनिन्, ‘मेरी आमाको मृत्यु कोरोना भाइरसका कारण भएको अब प्रष्ट भएको छ । यसबाट भाइरस कति खतरनाक छ भन्ने स्पष्ट हुन्छ । मेरी आमालाई अस्पताल लगेर भेन्टिलेटरमा राखेर उपचार गरिएपछि चिकित्सकले बचाउन सकेनन् ।’

मारिया मधुमेह रोगकी बिरामी थिइन् र संक्रमणपछि उनको अवस्था छिटो खराब भएको थियो । भेरा लुसियाको परिवार अब क्लोभिस र पाउलोको पोस्टमार्टम रिपोर्टको पर्खाइमा छ ।

भेरा लुसिया र उनका छोरा दुवै जनालाई कोरोना संक्रमणका लक्षण पाइएपनि उनीहरु बाँच्न सफल भएका छन् । भेराले भनिन्, ‘शारीरिक रुपमा म ठीक छु, अझै खोकी भने लाग्दैछ । तर यो कठिन समय हो र हामी डरैडरमा बाँचिरहेका छौं ।’

उनको जन्मदिनको पार्टीमा सहभागी भएकामध्ये १० जनाभन्दा बढीमा कोरोना संक्रमण पाइएको थियो । उनीहरुमध्ये केहीको भेन्टिलेटरमा राखेर उपचार गरिएको छ ।

कोरोना संक्रमणका कारण क्वारेन्टाइनमा बस्दा अन्त्येष्टिसमेत गर्न समस्या भएको छ । उनले जन्मदिनको पार्टी जीवनभरका लागि घाउ बनेको बताएकी छन् ।