उदयपुर, ५ वैशाख-कोरोना भाइरस (कोभिड–१९) को प्रकोप रोक्न ११ चैतदेखि मुलुक लकडाउनमा छ । लकडाउन अझै कति दिनसम्म चल्छ भन्ने टुंगो छैन ।यस्तो अवस्थामा दैनिक औषधि सेवन गरिरहेका बिरामीको समस्या मध्यनजर गर्दै उदयपुरको बेलका नगरपालिकाले सुनसरीको धरान, इटहरी र मोरङको विराटनगरबाट बिरामीका लागि औषधि उपलब्ध गराइरहेको छ ।

१८ चैतयता मानसिक, सगुर, प्रेसर, मुटसम्बन्धी रोगका ६२ जना बिरामीलाई औषधि उपलब्ध गराइएको छ । नगरपालिकाले बिरामी र औषधि बोक्न एम्बुलेन्ससँगै शव बहानको पनि प्रयोग गरिरहेको छ । ‘हरेक दिन बिरामी लिएर सुनसरीका मुख्य शहर धरान, इटहरी र मोरङको विराटनगर जाँदा एम्बुलेन्सले अत्यावश्यक औषधिहरू पनि लिएर आउने गरेको छ’, स्वयंसेवक सुदीप राउतले भने ।

हिजोआज औषधि ल्याइदिन भन्दै बिरामी र बिरामीका आफन्तले नगरपालिकाका कर्मचारीलाई फोन गर्ने गर्छन् ।‘म मानसिक समस्यासँग जुधिरहेकी छु, डाक्टरले जीवनभरी औषधि खानुपर्छ भनेका छन् । औषधि सकिन लागेका बेला नगरपालिकाले औषधि ल्याइदियो र थप समस्याबाट जोगिएँ’, भागलपुरकी एक महिलाले भनिन् । नगरपालिकाले विराटनगरको अटल फार्मेसीबाट ती महिलाका लागि ओसिएन आरटी नामको औषधि ल्याइदिएको हो ।

औषधि ल्याउने काममा एम्बुलेन्सका चालकद्वय जिन्जर तामाङ र जंगबहादुर विष्ट खटिएका छन् भने बिरामीसँग समन्वय स्वयंसेवक सुदीप राउतले गर्दै आएका छन् ।