विराटनगर, २७ असोज । मोरङको धनपालथान गाउँपालिकाको कर्सियास्थित सिटिजन्स बैंक शाखा लुटपाटमा संलग्न तीन जनालाई प्रहरीले सार्बजनिक गरेको छ ।

बुधबार दिउँसो जिल्ला प्रहरी कार्यालय मोरङले विराटनगरमा पत्रकार सम्मेलन गर्दै उनीहरुलाई सार्बजनिक गरेको हो  बैंक लुटपाटमा संलग्न भएको आरोपमा पक्राउ परेका विराटनगर महानगरपालिका–८ का ३२ वर्षीय श्याम मुखिया, भारतको अररिया सेखपुरा ५ का २८ वर्षीय सुनिल यादव र भारत अररिया गोराहा ४ का ३० वर्षीय को बिजय सहनीलाई प्रहरीले पत्रकार सम्मेलन गरि सार्बजनिक गरेको हो ।

उनीहरुसहित ७ जनाको लुटेरा समुहले असोज २५ गते धनपालथान गाउँपालिका—४ कर्सियास्थित सिटिजन्स बैंकको शाखामा हतियारसहित लुटपाट गरेको थियो । सो दिन अपराहन्न ७ जनाको लुटेरा समूहले एक्कासी बैंक भित्र पस्ने क्रममा बैंकका सुरक्षा गार्ड सितल कुमालसँग भएको खुकुरी खोसेर पेस्तोल ताक्दै नियन्त्रणमा लिने प्रयास गरेको थियो ।

दुइ लुटेराले पेस्तोल ताक्दै नियन्त्रणमा लिन खोजेपछि प्रतिकार गर्दा पछाडिबाट अर्को एक लुटेराले गार्ड कुमाल माथि गोली प्रहार गर्दा दाहिने पातामा गोली लागि घाइते भएका थिए ।

गोली चलेर हो हल्ला हुनथालेपछि लुटेराहरु फरार भएका थिए । गोली प्रहारबाट घाइते सुरक्षा कार्ड कुमालको तत्काल विराटनगरस्थित न्युरो अस्पतालमा उपचार गरिएको थियो । हाल उनी खतरा मुुक्त रहेको प्रहरीले जनाएको छ ।

लुटपाटको घटनालगतै जिल्ला प्रहरी कार्यालय मोरङका प्रमुख प्रहरी उपरिक्षक जनाद्र्धन जिसिसहितको टोली खटि गई लुटेरा समुहका ३ जनालाई धनपालथान गाउँपालिका–२ खयरबना चोक नजिकैबाट माटरसाईकल र हतियार सहित नियन्त्रणमा लिन सफल भएको थियो ।
अन्यको खोजि कार्य जारी रहेको जिल्ला प्रहरी कार्यालय मोरङका प्रमुख प्रहरी उपरिक्षक जिसिले जानकारी दिए ।

पक्राउ परेका लुटेराहरुका साथबाट प्रहरीले लुटपाटमा प्रयोग भएको को २५ प ३८९९ नम्बरको पल्सर मोटरसाईकल, एक राण्ड गोलि सहितको कटुवा पेस्तोल, घटनास्थलमा पेस्तोलको नपड्किएको एक राउड र एक खोका गोली घाइते गार्ड सितल कुमालको शरिरवाट निकालिएको गोली र नोकिया कम्पनीको सादा मोवाईल एक थान बरामद गरिएको प्रहरी उपरिक्षक जिसिले जानकारी दिए ।