काठमाडाैं, बैशाख ३-उपत्यका प्रहरीले लकडाउनमा कडाइ गरेको छ । सरकारले मंगलबार लकडाउन बढाएर १५ वैशाखसम्म लम्ब्याउने निर्णय गरेसँगै प्रहरीले पनि लकडाउनमा कडाइ गरेको हो । यसअघि ११ चैतदेखि कोरोना भाइरस (कोभिड—१९) को जोखिम रहेको भन्दै सरकारले ३ वैशाखसम्म लकडाउनको घोषण गरेको थियो ।

तर, पछिल्लो समय कोरोना संक्रमितको सख्या बढ्दै गएपछि सरकारले लकडाउनलाई बढाएर १५ वैशाखसम्म तोकेको छ । हालसम्म नेपालमा १६ जनामा कोरोना भएको पुष्टि भएको छ ।

बुधबारबाट लकडाउन उल्लंघन गर्ने र लकडाउन अवधिका लागि दिएको पासको दूरुपयोग भएको पाएपछि चेक जाँचमा कडाइ गरिएको ट्राफिक महाशाखाका प्रमुख एसएसपी भीम ढकालले जानकारी दिए ।

यसको लागि दिनमा १ सय ५५ स्थान र रातिको समयको लागि ४५ स्थानमा चेकजाँच गर्ने व्यवस्था मिलाइएको उनको भनाइ छ । हालसम्म प्रहरीले लकडाउन उल्लंघन गर्ने ८ हजार ९ सय ७४ सवारी साधनलाई कारबाही गरेको जनाएको छ । यसरी नै १ हजार ८ सय ८६ वटा सवारी साधनले पास दुरुपयोग गरेको भेटिएपछि नियन्त्रमा लिएको जनाएको छ ।