प्रधानमन्त्री केपी शर्मा ओली कुवेतमा रहेका नेपालका बारेमा चासो व्यक्त गरेका छन् । कुवेतमा रहेका नेपालीको अवस्था बुझ्न प्रधानमन्त्री ओलीले समकक्षीसँग मंगलबार दिउँसो फोन सम्वाद गरेका हुन् ।

कुवेतका प्रधानमन्त्री सवाह अल खालिद अल सवाहसँग भएको टेलिफोन सम्वादमा त्यहाँ कार्यरत नेपालीको सुरक्षा र कल्याणको बारेमा आफ्नो चासो राखेको प्रधानमन्त्रीले ट्विटमार्फत जानकारी दिएका हुन् ।

जवाफमा कुवेतका प्रधानमन्त्रीले नेपालीलाई कुनै पनि अप्ठ्यारो पर्न नदिने र उनीहरूको उपचारमा खुल्ला दिलले सहयोग गर्ने प्रतिबद्धता व्यक्त गरेका छन् ।

‘आज दिउँसो कुवेतका प्रधानमन्त्रीसँग भएको टेलिफोन संवादमा मैले त्यहाँ कार्यरत नेपालीहरुको सुरक्षा र कल्याणको बारेमा आफ्नो चासो राखेँ’ उनले ट्विटमा लेखेका छन्, ‘कुवेतका प्रधानमन्त्रीले नेपालीलाई कुनै पनि अप्ठ्यारो पर्न नदिने र उनीहरूको उपचारमा खुल्ला दिलले सहयोग गर्ने प्रतिबद्धता व्यक्त गर्नुभयो।’