रुपन्देहीको सिमावर्ती भारतीय शहरमा कोरोना संक्रमित फेला परेपछि रुपन्देहीसँग जोडिएका सबै नाका शिल गरिएको छ ।जिल्ला प्रशासन कार्यालय रुपन्देहीका अनुसार सीमाबाट हुन सक्ने आवाजजावतलाई ध्यान दिँदै उच्च सतर्कता अपनाइएको छ । रुपन्देहीको मर्चवार क्षेत्रदेखि ५ किलोमिटरको दूरीमा रहेको कोल्हुई र पुन्दपुर क्षेत्रको चाउगाउँमा हिजो मात्र ६ जना कोरोना संक्रमित भेटिएपछि भारतसँग जोडिएका सबै साना नाकाहरू शिल गरिएको हो ।

लकडाउन हुनुपूर्व मर्चवार क्षेत्रका जनता सोही बजारमा किनमेलका लागि दिनहुँ जाने गर्दथे । सोही गाउँबाट भैरहवा, बुटवल तथा यस आसपासका बजारमा हरियो तरकारी समेत आउने गर्दछ । रुपन्देहीकै समरीमाई गाउँपालिका पनि सो गाउँबाट २५ किलोमिटर दूरीमा पर्दछ ।रुपन्देहीका प्रमुख जिल्ला अधिकारी महादेव पन्थले सीमा नाकामा हाललाई सशस्त्र प्रहरीहरूलाई खटाएर मानिसहरूको आवाजजावतलाई निगरानी गर्न थालिएको जानकारी दिए ।