विराटनगर, चैत १०–धरान उपमहानगरपालिकाले ‘लक डाउन’ मा जाने निर्णय गरेको छ । विश्वव्यापी रुपमा फैलिएको कोभिड–१९ कोरोना भाइरसको सम्भावित संक्रमणबाट बच्नका लागि लकडाउनको घोषणा गरिएको धरान उपमहानगरपालिकाकी उपमेयर मञ्जु भण्डारीले बताइन् ।

लकडाउनका घोषणा भएसँगै धरानबाट विभिन्न स्थानमा छुट्ने कुनै पनि सवारी साधनहरु चलेका छैनन् । भानुचोकस्थित बसपार्क अहिले खाली गरिएको छ । तर काठमाडौं, पोखरालगायतबाट रात्री बसमा आएका यात्रुहरु भने भानुचोकमा अलपत्र परेका छन् ।

धरानमा अलपत्र परेका यात्रुलाई भने गन्तव्यमा पुर्याउने व्यवस्था गरिने धरान उपमहानगरपालिकाकी उपमेयर भण्डारीले बताइन् । उनका अनुसार अहिले धरानमा भएका यात्रुहरुलाई सम्बन्धित गन्तव्यमा पुर्याउने व्यवस्था मिलाएर २१ गतेसम्मका लागि लकडाउन गरिएको छ ।

उनले सबै नगरबासीहरुलाई कोरोनाको सम्भावित जोखिमबाट बच्नका लागि घर बाहिर ननिस्कन आग्रह गरेकी छन् । सरकारले नागरिकको जीवनको रक्षाका निम्ति यी सबै कदम चालिएकाले त्यसलाई नागरिकले अक्षरश पालना गर्नुपर्ने उनले बताइन् ।