विराटनगर, फागुन २२–अखिल नेपाल महिला संघ धरानले अन्तर्राष्ट्रिय नारी दिवसको अवसर पारेर कोरोना भाइरसविरुद्ध सचेतना अभियान सुरु गरेको छ । धरान उपमहागरपालिका वडा नं. ७ को सहकार्यमा संघले धरानको ७ नं. वडामा कोरोना भाईरसका बारेमा जानकारी लेखिएको पर्चा बाड्न सुरु गरेको हो ।
बिहिबार धरान उपमहानगरपालिकाकी उपमेयर मञ्जु भण्डारीले कार्यक्रम सुरु गर्दै कोरोनाबाट बच्न सरकार सतर्क भइसकेको भन्दै नागरिक पनि सचेत हुन आवश्यक रहेको बताइन् । उनले चीनबाट सुरु भएको कोरोना भाइसको संक्रमणको जोखिम नेपालमा उच्च रहेको भन्दै अनेम संघले सुरु गरेको अभियानमा सम्पूर्ण नागरिक सहभागी भइ सचेत हुनुपर्ने बताइन् ।
अखिले नेपाल महिला संघ सुनसरीकी कार्यवाहक अध्यक्ष बेणु काफ्लेले हरेक वर्ष मार्च ८ मा मनाइने अन्तराष्ट्रिय नारी दिवसमा यस पटक कोरोना विरुद्ध सचेतना अभियान चलाइएको बताइन् । उनले सचेतनाका लागि सबै वडामा आफुहरु पुग्ने बताइन् ।
