काठमाडौं, फागुन १९–नेपाली कांग्रेसका सभापति शेरबहादुर देउवाले असन्तुष्ट नेताहरूको सहमतिविना नै पार्टीका ७ केन्द्रीय सदस्यलाई केन्द्रीय विभागहरूको प्रमुखमा मनोनयन गरेका छन् । सभापति देउवाले विभाग गठनका लागि वरिष्ठ नेता रामचन्द्र पौडेलसँग सहमति लिन खोजे पनि पौडेलले १४औँ महाधिवेशनको मिति घोषणा गरिसकेको अवस्थामा विभाग गठन नगर्न भनेका थिए ।

सभापति देउवाले संस्थापन पक्षधर केन्द्रीय सदस्यहरू एनपी साउदलाई शुभेच्छुक संस्था समन्वय विभाग, अम्बिका बस्नेतलाई वन, वातावरण तथा विपद् व्यवस्थापन विभाग, ईश्वरी न्यौपानेलाई महिला विभाग र केशवकुमार बुढाथोकीलाई राज्य प्रशासन विभाग प्रमुखको जिम्मेवारी दिइएको छ ।

पार्टी केन्द्रीय कार्यालयका मुख्य सचिव कृष्णप्रसाद पौडेलले जारी गरेको विज्ञप्तिअनुसार पूर्वसञ्चारमन्त्री मोहनबहादुर बस्नेतलाई खेलकुद, वीरबहादुर बलायरलाई निर्माण व्यवसायी समन्वय र हरिप्रसाद नेपाललाई शिक्षा विभाग प्रमुखको जिम्मेवारी दिइएको हो ।