करिब १ करोडको सुनसहित तीन जना पक्राउ

काठमाडौं, माघ २९–प्रहरीले करिब १ करोड रुपैयाँबराबरको सुनसहित तीन जना पक्राउ गरेको छ । महानगरीय अपराध महाशाखा ललितपुरको टोली र महानगरीय प्रहरी प्रभाग पुल्चोकको संयुक्त टोलीले उनीहरूलाई बुधबार थानकोट सतुंगलबाट पक्राउ गरेको हो ।

पक्राउ परेका तीनै जना भारतीय नागरिक रहेको प्रहरीको भनाइ छ । पक्राउ परेकाहरूले ललितपुरको एक सुन पसल लुटेर भागेको प्रहरीले जनाएको छ । पक्राउ परेकाहरूको नाम खुल्न बाँकी छ । अन्य केही अझै फरार रहेको र यसबारे प्रहरीले अनुसन्धानपछि सार्वजनिक गर्ने तयारी गरेको बताएको छ ।