विराटनगर, माघ १७–सुनसरीको धरानबाट २ नाल भरुवा बन्दुकसहित ४ जना शिकारीलाई प्रहरीले पक्राउ गरेको छ । धरान उप–महानगरपालिका–६ बाट २ नाल भरुबा बन्दुक र मृत बँदेलसहित ४ जनालाई प्रहरीले शुक्रबार बिहान नियन्त्रणमा लिएको हो ।

प्रहरी चौकी पानवारीबाट गस्तीमा खटिएको प्रहरी टोलीले धरान–६ स्थित गौडे आहालको जंगलबाट निस्कँदै गरेका पानवारीका ३० वर्षीय मणि तामाङ, २६ वर्षीय सिद्धार्थ राई, ३९ वर्षीय रामबहादुर योन्जन र ३० वर्षीय शम्भु दाहाललाई चेकजाँच गर्दा २ नाल भरुवा बन्दुक र मृत अवस्थाको करिब ६ किलो तौल भएको बँदेल बरामद गरेको थियो ।

प्रहरीले उनीहरूले प्रयोग गरेको को २० प ८७१६ र ना १४ प ६४३३ नम्बरका मोटरसाइकलसमेत नियन्त्रणमा लिएको छ । पक्राउ परेका चारै जनाको विषयमा थप अनुसन्धान भइरहेको इलाका प्रहरी कार्यालय धरानले जनाएको छ ।