धनगढी, मंसिर ३०–वर्षाका कारण सुदूरपश्चिम प्रदेशका इँटा उद्योगमा करिब १५ करोड रुपैयाँबराबरको क्षति भएको छ । शुक्रबार र शनिबारको वर्षाले कैलाली र कञ्चनपुरका इँटा व्यवसायी मर्कामा परेका हुन् । वर्षातले कैलाली, कञ्चनपुरका ७० वटा इँटा उद्योगका सञ्चालकलाई सो रकमबराबरको क्षति पुगेको सेती महाकाली इँटा व्यवसायी संघका अध्यक्ष विनोदकुमार शाहले बताए । उनले भने, ‘कैलाली र कञ्चनपुरमा ७० इँटा उद्योग छन् । तीमध्ये हरेक इँटाभट्टामा १२ देखि १५ लाख रुपैयाँसम्मको क्षति भएको छ ।’

घाममा सुकाइरहेका सबै इँटाहरू वर्षातले गलेपछि इँटा व्यवसायीलाई ठूलो क्षति पुगेको उनले बताए । ‘विगतका वर्षहरूमा पुस अन्तिम तथा माघमा पर्ने पानी यस वर्ष भने मंसिर अन्तिम सातामै पर्दा भट्टीमा हाल्नुअघि घाममा सुकाउँदै गरेका सबै इँटा पानीले सखाप पारिदिएको छ’, उनले भने, ‘अन्य वर्षमा हामीले घाममा सुकाइसकेर इँटालाई भट्टीमा राखिसकेपछि पानी पर्थ्यो ।’ महाकाली इँटा व्यवसायी संघका अध्यक्ष बलदेवसिंह बुडालले २०४७ सालपछि इँटा व्यवसायमा ठूलो क्षति अहिले नै भएको बताए ।