विराटनगर, पुस २१–विराटनगरमा जारी १ महिने जुत्ता चप्पल व्यापार मेलामा ग्राहाकको उल्लेख्य भिड बढेको छ । ‘स्वदेशी वस्तुको प्रवद्र्धन हाम्रो अभियान’ भन्ने नारा सहित विराटनगर स्थित जैन भवनमा पुस १ गतेदेखी सुरु भएको सो मेलामा १५ देखि ६० प्रतिशत सम्म छुट सुविधा पाएपछी जुत्ता चप्पल खरिद गर्ने उपभोक्ताको भिड लागेको हो ।

१ महिनामा डेढ करोडको कारोबार हुने अनुमान गरिएपनि २० दिनमै करिब डेढ करोड बढीको कारोबार भएको मेला संयोजक तथा नेपाली जुत्ता घरका अध्यक्ष होमनाथ उपाध्यायले जानकारी दिए । उनले २० दिनमै भएको कारोबारबाट आफुहरु उत्साहित बनेको बताएका छन् । उपाध्यायले मेलामा पाइने सुविधाबारे विस्तारै उपभोक्ताले थाहा पाउँदै जान थालेपछी यतिबेला दैनिक ग्राहाकको संख्यासमेत बढ्दै गएको जानकारी दिए ।

उपाध्यायले हाल सम्म मेलामा २० हजार भन्दा बढीले खरिद तथा अवलोकन गरेकोसमेत जानकारी दिए । मेलामा नेपालमा नाम चलेका चर्चि शिखर सुज, बि.एफ. डियर हिल सुज, रन सुज, शु लैण्ड, लैण्ड वाक र हाइ लाईफ सुज एण्ड स्लीपर ब्राण्डका जुत्ता, चप्पल राखिएको छ । मेलामा १ सयदेखी १० हजार मुल्यसम्मका जुत्ता चप्पल उपलब्ध हुनका साथै ३ हजार बढी मोडलका जुत्ता, चप्पल एकै ठाउँमा आफ्नो रोजाइ अनुसार खरिद गर्न सकिने मेला संयोजक उपाध्यायले जानकारी दिए ।

मेला आगामी पुस २९ गते सम्म मात्र सञ्चालन हुने भएकाले उपभोक्तालाई मौकाको सदुपयोग गर्न मेला आयोजकले आग्रह गरेको छ । सस्तोमा छुटसहित नेपालमै नाम चलेका चर्चित स्वदेशी ब्राण्डका गुणस्तरीय जुत्ता चप्पल खरिद गर्न पाएपछी उपभोक्ताहरु समेत खुशि भएका छन् । उनीहरुले एकै छानामुनि विषेश छुटमा सस्तोमा जुत्ता चप्पल छानेर लान पाइने भएकाले यस्तो मेला नियमित लाग्नुपर्ने बताएका छन् ।