विराटनगर । फरार भएको एक जना कैदीलाई प्रहरीले एक हप्तापछि पक्राउ गरेको छ । डियुटिमा खटिएको प्रहरीलाई लडाएर विराटनगरस्थित कोशी अस्पतालबाट फरार भएको भनिएका विराटनगर–८ घर भएका २३ वर्षीय आर्यन महमद अहमद खान भनिने मोहमद अहमदलाई फरार भएको एक हप्तापछि बुधबार प्रहरीले पक्राउ गरेको हो ।
उनलाई नेपाल–भारत सीमानजिक मोरङको जहदा गाउँपालिका–१ तारेगामबाट पक्राउ गरिएको मोरङ प्रहरी प्रमुख एसपी नवराज कार्कीले बताए । मोरङको बेलबारी घर भएकी १५ वर्षीया एक जना किशोरीलाई जवरजस्ती करणी मुद्दामा १२ वर्ष कैद सजाय ठहर भएर जिल्ला कारागार मोरङमा कैद सजाय भुक्तान गरिरहेका अहमद साउन १७ गते बिहान साढे पाँच बजे अस्पतालबाट फरार भएका थिए । उनलाई उपचारका लागि साउन १५ गते कोशी अस्पताल भर्ना गरिएको थियो । उपचाररत अस्पतालबाटै डियूटिमा खटिएका प्रहरीलाई लडाएर उनी फरार भएपछि प्रहरीले खोजी तीव्र पारेको थियो ।

हप्तादिनसम्म फरार कैदी कहा–कहा पुगे ?
अस्पतालबाटै कैदी आर्यन फरार भएपछि इलका प्रहरी कार्यालय रानीका प्रमुख प्रहरी निरीक्षक प्रकाश थापाको नेतृत्वको तीन सदस्य टोली परिचान भयो । फरार भएका कैदी सोही दिन जोगवनी नाकाबाट भारत पुगे । उनलाई अस्पतालबाट रिसिभ गरेर बोर्डरसम्म कैदीका भाइले पुर्याएको पाइएको छ । ‘यस विषयमा पनि हामीले अनुसन्धान गर्दै आएका छौं,’ एसपी कार्कीले भने ।
फरार भएका कैदीको घर आफन्त कतै पत्ता नपाएपछि प्रहरीले भारत भागेको निष्कर्षमा पुग्यो । तर, भारतको कुन ठाउँमा छ । त्यो भने पत्ता लागेन । त्यसपछि अनुसन्धान अधिकृत कैदीको एक जना साथीमार्फत उनलाई जवरजस्ती करणी मुद्दा हाल्ने पीडितसँग फरार कैदीको सम्र्पक हुने गरेको जानकारी पायो । त्यसपछि फोन सम्र्पकबाट जसलाई कैदी आर्यनले जवरजस्ती करणाी गरेर कैद भुक्तान गर्दै आएका थिए । उनीहरुबीच कुराकानी भेटघाट हुने गरेको थियो । त्यो कुरा प्रहरीले कैदीको मिल्ने साथीमार्फत जानकारी पायो । ती साथीले उक्त कुरा प्रहरीलाई जानकारी दिए । त्यसपछि अनुसन्धानमा खटिएका प्रहरी टोली पीडित किशोरीमा घरमा पुगेर कैदी फरार भएको घटना सुनाएपछि पक्राउको लागि सहयोग गरिदिन आग्रह गरे । ‘फोन सम्र्पकमा कैदी र पीडित किशोरीबिच कुराकानी भएपछि उनले पनि भारतको लोकेसन भनिदिए । त्यसपछि भारतको जारखण्ड राज्यको साहियबगन्जको आफन्तको बस्ने गरेको कुरा कैदीले पीडितलाई भने । त्यसपछि इप्रका रानीका प्रहरी निरीक्षक थापा नेतृत्वको टोली खोजी कार्यमा परिचालन भयो । कैदीले ती युवतीलाई फरार भएको भोलीपल्ट फोन गरेको पाइएको छ । फोन सम्र्पकमा युवतीलाई कटियारसम्म आउ म लिन आउँछुसम्म भनेका रहेछन्,’ उनीहरुबिच भएको कुराकानी उद्रति गर्दै एक अनुसन्धान अधिकृतले भने, ‘त्यसपछि युवतिको सहारबाट कैदीलाई समाउन एक हप्तामा पक्राउ गर्न सजिलो भयो ।’