सिद्धबाबा प्रकरण :आरोपित गिरीको बयान सकियो, थुनछेक बहस आइतबार - News Birat

सिद्धबाबा प्रकरण :आरोपित गिरीको बयान सकियो, थुनछेक बहस आइतबार

न्यूज विराट

विराटनगर, पुस ११–अनुयायी महिलालाई बलात्कारको आरोप लागेका सिद्धबाबा भनिने कृष्णबहादुर गिरीको आज बयान लिइएको छ । गिरीको बयान लिए पनि कार्यालय समय सकिएकाले थुनछेक बहस भने आइतबारका लागि तोकिएको छ । सरकारी वकिलमार्फत अदालतमा अभियोग पत्र दायर गरिएपछि कृष्णदाससँग अदालती बयान लिइएको हो । बयान सकिएको र थप अदालती प्रक्रिया आइतबार सुरु हुने स्रेस्तेदार नरेन्द्रकेशरी पोखरेलले जानकारी दिए । गिरीलाई बयानका लागि अदालत लगिँदा अदालत परिसरबाहिर दोहोरो नाराबाजी भएको थियो ।

अनुयायीहरुले उनकोको समर्थनमा जयजयकार गर्दा महिला अधिकारकर्मी लगायतको समूहले बलात्कार आरोपित गिरीलाई कानुनी कारवाहीको माग गर्दै प्रदर्शन गरेका थिए । दिनभर अदालत आसपासका सडकमा नाराबाजी चलेको थियो । बयान सकिएसँगै आरोपित गिरीलाई पुनः अस्पताल फर्काइएको छ । सरकारी वकिलमार्फत अदालतसमक्ष बुझाइएको अभियोग पत्रमा कृष्णबहादुर गिरीले मूलुकी अपराध संहिता, २०७४ को दफा २१९को १, २ र ३(ङ) बमोजिम कसुर गरेको तथ्य पुष्टि भएको व्यहोरासहित सजाय माग दावी गरिएको छ ।

अभियोग पत्रमा कृष्णबहादुर गिरीले अनुयायी महिलालाई जबर्जस्ती करणी गरेको तथ्यसहित हदैसम्मको सजाय मागदावी गरिएको छ । अदालतले आइतबारको थुनछेक बहसपछि साधारण तारेख, धरौटी वा पुर्पक्षका लागि थुनामा पठाउनेमध्ये कुनै एक आदेश दिनसक्छ । गिरीलाई लगाइएको अभियोग प्रमाणित भएमा उनलाई ७ देखि १० वर्षसम्म सजाय हुने कानुनीमा उल्लेख छ।

मा प्रकाशित

यसमा तपाईको मत:

© Copyright 2017 - 2021 Newsbirat pvt ltd. All Rights Reserved.

Design / Developed by codebundles