विराटनगर । सवारी व्यवस्थापन, दुर्घटना न्यूनीकरण गर्न तथा ट्राफिक जनचेतना अभिवृद्धिका लागि जिल्ला ट्राफिक प्रहरी कार्यालय मोरङले सिटी सफारी चालकहरुलाई ‘सडक सुरक्षा तथा ट्राफिक सचेतना’ गराएको छ ।
मोरङ ट्राफिक प्रहरी कार्यालयको अगुवाईमा विराटनगरका सिटी सफारी चालकहरुलाई ट्राफिक चेतनामूलक कार्यक्रम गरी सवारी दुर्घटना न्युनिकरणको लागि ‘सडक सुरक्षा तथा ट्राफिक सचेतना’ गराएको जिल्ला ट्राफिक प्रहरी कार्यालय मोरङका प्रमुख ट्राफिक प्रहरी निरीक्षक सुमन न्यौपानेले जानकारी दिए ।

कार्यक्रममा सिटी सफारी चालकलाई लक्षित गरी सवारी दुर्घटना न्यूनिकरण गराउने उद्देश्यले सडक अनुसुशासनको बारेमा जानकारी गराएको उनले बताए । साथै दुर्घटना न्यूनीकरण गर्न, सडक अनुशासन कायम राख्न, सडक प्रयोगकर्तालाई जिम्मेवारी बोध गराउन महत्त्वपूर्ण भूमिका खेल्ने उनले बताए।

विराटनगरमा सवारी दुर्घटनाको विश्लेषण गर्दा सवारी दुर्घटना सिटी सफारीको कारणले पनि दुर्घटना हुने गरेको छ । तीव्र गति, ट्राफिक संकेत वा इशाराको उल्लंघन, मादक पदार्थ तथा लागु पदार्थ सेवन गरी सवारी साधन चलाउने जस्ता चालकको लापरबाहीका कारण हुने गरेको पाइएको ट्राफिक प्रहरीले जनाएको छ।

यस्तै सडकको अवस्था, सवारी साधनको खराब अवस्था र सवारीको यान्त्रिक गडबडी र सडक प्रयोगकर्तामा ट्राफिक नियमको पर्याप्त ज्ञानको अभाव पनि सवारी दुर्घटनाका कारण बनेकाले सडक सुरक्षा तथा ट्राफिक जनचेतना अभिवृद्धिका लागि सचेतना गरिएको प्रहरी निरीक्षक न्यौपानेले बताए ।

जिल्ला ट्राफिक प्रहरी कार्यालय मोरङका कार्यालय प्रमुख प्रहरी निरीक्षक न्यौपाने र प्रहरी नायव निरीक्षक सुन्दर श्याम पोखरेलबाट सवारी दुर्घटना न्यूनिकरण तथा सडक अनुशासन पालना गराउने उदेश्य अनुरुप विराटनगर रानी खण्डमा संचालन हुने सिटी सफारीका ५० जना चालकहरुलाई भेला जम्मा गरी सचेतना गराएका थिए । उनीहरुलाई सडक अनुशासन, लेनअनुशासन, ट्राफिक चिन्ह संकेत तथा सडक रेखाहरुको जानकारी, ट्राफिक नियम तथा जरिवानाको बारेमा सैद्धान्तिक प्रशिक्षण प्रदान गर्नुका साथै सवारी चालक अनुमति पत्र तथा सवारी दर्ता किताब अनिवार्य साथमा राखी सवारी चलाउन अनुरोध समेत गरिएको थियो ।