विराटनगर । विराटनगर विमानस्थल भित्रको होटलमा मनलाग्दी रूपमा खाद्यबस्तु विक्री वितरण गर्ने गरेको पाइएको छ ।
संस्कृति, पर्यटन तथा नागरिक उडड्यन मन्त्री सुदन किरातीले विराटनगर विमानस्थलमा बुधबार अनुगमनको क्रममा विमानस्थलभित्र होटलमा मनलाग्दी रुपमा खाद्यबस्तु विक्री वितरण गरेको पाइएको हो ।

विमानस्थल क्षेत्रभित्र तीन वटा होटल तथा रेष्टुरेन्टहरु संचालनमा रहेको छ । मन्त्री किरातीले आकस्मिक रुपमा गरेको अनुगमनको क्रममा व्यवसायीहरुले अधिकतम खुद्रा मुल्यभन्दा बढी मुनाफा राखेर खाद्यबस्तुहरु बिक्री वितरण गरेको सावाग्राहीहरुले गुनासो गरेका थिए । यहाँको होटल तथा रेष्टुरेन्टमा पानी, कफी, जङफुटलगायतका खाद्यबस्तुहरु एमआरपी मुल्यभन्दा झण्डै दोब्बर मुल्यमा विक्री गरेको पाइएको थियो । यहाँको रेष्टुरेन्ट तथा क्याफेले बढी मुनाफा राखेर चिसो पेय पदार्थ, चाउचाउ, बिस्कुट र खानेपानी लगायतका सामान बिक्री वितरण गरेको भेटिएको छ ।

अनुगमनका क्रममा तोकिएको अधिकतम खुद्रा मुल्यभन्दा बढी मुनाफा राखेर खानेकुरा बिक्री वितरण गरेको पार्ईएपछि मन्त्री किरातीले यसलाई तत्काल सुधार गर्न निर्देशन दिएका छन् । जनताले गुनासो सम्बोधन नभएको सुचना प्राप्त भएपछि मन्त्री किरातीले विराटनगर विमानस्थललाई समेत क्यू.आर कोड स्क्यानर राखेर जनताले सिधै मन्त्रालयमा सुचना दिन पाउने प्रणालीको विकास गर्न निर्देशन दिए ।
अनुगमनका क्रममा होटल व्यावसाय सञ्चालकहरुले भाडादर महङ्गो भएका कारण अधिक मुनाफा राखेर सामान बिक्री गर्नुपरेको गुनासो गरे । महङ्गो भाडादरको भार आम जनताले बोक्नुपर्ने कुनै आवश्यकता नरहेको भन्दै मन्त्री किरातीले बिषय स्पष्ट पारेका थिए । पसल व्यावसाय सञ्चालकहरुले तिर्दै आएको भाडादरको बिषय समेत तत्काल नियमन गर्न मन्त्री किरातीले निर्देशन दिए । मन्त्रीको निर्देशन पश्चात विराटनगर विमानस्थल प्रमुख रिन्जी शेर्पाले पसल व्यावसायीहरुसँग नयाँ सम्झौता गरिने बताए । एमआरपी मुल्यमा खाद्यबस्तु विक्री वितरण गर्न निर्देशन दिए ।
मन्त्री किरातीले यसअघि काठमाडौं अन्तराष्ट्रिय विमानस्थलमा पनि यसै किसिमको अनुगमन गरेका थिए । त्यहाँ पनि सामानमा उल्लेखित अधिकतम खुद्रा मूल्यभन्दा बढी शुल्क लिएको पार्ईएपछि उनले सुधार गर्न निर्देशन दिएका थिए ।