विराटनगर । विराटनगरस्थित महेन्द्र मोरङ क्याम्पसका क्याम्पस प्रमुख बावुराम तिम्सिनासहित चार जना शिक्षक कार्यकक्षमा थुनिएका छन् ।

स्वतन्त्र विद्यार्थी युनियन (स्वीयू) र महेन्द्र मोरङका विद्यार्थीहरुले क्याम्पस प्रमुख तिम्सिना, सहायक क्याम्प्स प्रमुख शिवराम चौधरी, बिबिएसको कोडिनेटर रामनारयण दास, बिबिएमका कोडिनेटर इन्द्रनारयण देवलाई सोमबार कार्यकक्षमा थुनिदिएका हुन् ।

इन्टनसिप गरेको रिपोर्टको शुल्क कलेज प्रशासनले आफुखुसी बढाएको भन्दै विद्यार्थीहरूले कलेज प्रमुखसहित विभाग्य प्रमुख शिक्षकहरुलाई कार्यकक्षमा थुनेका छन् । इन्टनसिप रिपोटको शुल्क यसअगाडी १ हजार रुपैयाँ क्याम्पसले लिदै आएको थियो । केही दिन अगाडीदेखि क्याम्पस प्रशासनले आफुखुसी तीन हजार रुपैयाँ शुल्क वृद्धि गरेपछि शिक्षकहरुलाई कार्यकक्षमा थुनिदिएको स्वीयू सभापति जोसवन पौडेलले जानकारी दिए । ‘विद्यार्थीहरूलाई जानकारी बिना क्याम्पस प्रशासनले आफुखसी शुल्क बृद्धि गरेपछि हामीले यसअघि निर्णाय सच्याउन भनेका थियौं,’ उनले भने, ‘क्याम्पस प्रशासनले वृद्धि भएको शुल्क नघटाएपछि हामीले क्याम्पस प्रमुख सहित शिक्षकहरुलाई कार्यकक्षमा थुनिदिएका छौं ।’

विद्यार्थीहरुले इन्टनसिप रिपोटको साविकको शुल्क कायम गरिनुपर्ने भन्दै यसअघि २४ घण्टाको समय दिएको थियो । क्याम्पसले शुल्क नघटाएपछि तालाबन्दी गरेको थियो । त्यसपछि अहिले आएर विद्यार्थीहरुले क्याम्पस प्रमुखहित शिक्षकहरुलाई कार्यकक्षमा थुनेका हुन् ।