विराटनगर, फागुन २२–विश्व स्वास्थ्य संगठनले नेपाललाई कोरोना भाईरसको उच्च जोखिममा समावेश गरेपछि मुलुकभर यतिबेला ‘मास्क’ को कृतिम अभाव सृजना भएको छ । कोरोना भाइरस संक्रमणबाट बच्नका लागि सतर्कता अपनाउँदै सवैले ‘मास्क’ को प्रयोग गर्न थालेपछि प्रदेश १ को राजधानी विराटनगरमा पनि ‘मास्क’ को कालोबजारी सुरु भएको छ । औषधी पशल सञ्चालक र मास्क विक्रेताहरुले चर्को मुल्य असुल्न कृतिम अभाव सृजना गरेको सरोकारवालाहरुले बताएका छन् ।

यतिबेला विराटनगरमा सामान्य मास्कको मुल्य समेत आकाशिएको छ । मास्क विक्रेता पशले र फार्मेशिहरुले सर्वसाधारणसँग मु्ल्य भन्दा ३ देखि १० गुणा बढी अशुल्ने गरेको पाइएको छ । विराटनगरका विभिन्न फार्मेशिहरुले कृत्तिम अभाव सृजना गरेर चर्कोमुल्य अशुल्ने गरेको सर्व साधारणले गुनासो गरेका छन् । कोरोना भाइरसबाट जोगिन सबैभन्दा सुरक्षित मानिने सर्जिकल माक्स मात्रै नभएर साधारण मास्क समेत बजारमा चर्को मुल्यमा विक्रिवितरण भइरहेको पाइएको हो ।

तीनै तहका सरकारले भाइरसबाट जोगिन उच्च सतर्कता अपनाई अनिवार्य मास्कको प्रयोग गर्न आग्रह गरेपछी व्यपारीहरुले मास्कको मुल्य बढाएका हुन् । यतिवेला सवैले प्रायः मास्क लगाएर हिँड्न थालेका छन् । विभिन्न निजि तथा सामुदायीक विद्यालयहरुले पनि आफ्ना विद्यार्थीहरुलाई अनिर्वारुपमा विद्यालय आउँदा मास्कको प्रयोग गर्न लगाएको अभिभावकहरुले बताएका छन् ।

यतिवेला स्वास्थ्यको हव समेत रहेको विराटनगरका विभिन्न अस्पतालमा पनि सर्जिकल मास्कको अभाव भएको छ । मास्क अभाव हुन् थालेपछि बजारमा केहि व्यापारीहरुले कोरोना त्रासको फाईदा उठाउँदै महँगो मूल्यमा मास्क बेच्न थालेका छन् । ५ रुपैयामा पाईने मास्क अहिले २० देखी ५० रुपैयाँ सम्ममा बेच्ने गरेको पाइएको छ ।