विराटनगर । महानगरको कामकारबाहीको आलोचना गर्दै विराटनगर महानगरपालिका अगाडि ब्यानर बोकेर उभिने विराटनगरकी ५२ वर्षीया इन्दिरा चापागाई पक्राउ परेपछि मेयर नागेश कोइरालाको सामाजिक संजालमा चौतर्फी विरोध सुरु भएको छ ।

सामुदायिक विद्यालय शिक्षा सुधारको माग गर्दै महानगरपालिका अगाडि दैनिक धर्ना बस्दै आएकी चापागाईंलार्ई प्रहरीले पक्राउ गरी अभद्र्र व्यवहारको मुद्दामा म्याद थप गरी अनुसन्धान सुरु गरेको छ । उनी पक्राउ परेसँगै अहिले सामाजिक संजालमा मेयरको चौतर्फी रुपमा विरोध सुरु भएको छ । चापागाइलाई तत्काल रिहाइ गरीनुपर्ने माग पनि राखेका छन् ।
काँग्रेसका युवा नेता सालिम अन्सारीले सामाजिक अभियान्ता चापागाई तत्काल रिहाइ नगर आन्दोलनमा उत्रिने चेतवनी समेत दिएका छन् । ‘जायज माग राखेर शान्तपुर्वक सघर्ष गर्नु मौलिक अधिकार हो । तर शिक्षामा सुधारको माग गर्दै संघर्ष गर्दै आएकी शुसासनकी अभियन्ता ईन्दिरा चापागाँईलाई विराटनगरका मेयरले आफुलाई दुर्व्यवहार गरेको आरोप लगाएर प्रहरी खोरमा थुनाएर सात दिन म्याद थप गरि अभद्र ब्यावहारको मुद्दा लगाउनु निर्धामाथि पहुँच र पावरवालाहरुको अत्याचारी व्यवहार नै हो । आईतवारसम्म शुशासन अभियन्ता चापागाईं रिहा गरिएन भने हामी सडक सँघर्षमा उत्रन्छौँ अन्सारी,’ समाजिक संजालमा लेखेका छन् ।

मेयर कोइरालालाई अभद्र व्यवहार गरेको भन्दै विराटनगर महानगरपालिकाले जिल्ला प्रशासन कार्यालय मोरङमा उजुरी दिएको थियो । महानगरको मेयरबाट उजुरी आएपछि विराटनगर ५ निवासी चापागाईंलाई पक्राउ गरी अभद्र व्यवहार मुद्दामा म्याद थप गरिएको छ ।