अनलाइन न्यूज पोर्टलमा प्रकाशित भएको समाचार हटेको प्रकरणमा ‘काठमाडौं प्रेस डटकम’को साइट निर्माण कम्पनी सिरान टेक्नोलोजिज प्रा.लि.ले माफी मागेको छ ।

‘११ वर्षअघि सिरान टेक्नोलोजिज प्रालि स्थापना भएपछि हामीले १०० भन्दा बढी न्यूजपोर्टलहरूको सीएमएस निर्माणदेखि व्यवस्थापन गर्दै आएका छौँ । यो ११ वर्षमा हामीले यस्तो प्रकारको समस्या पहिलोपटक भोगेका हौँ’, टेक्नोलोजिजका अध्यक्ष विश्वास ढकालद्वारा बिहीबार साँझ जारी गरिएको विज्ञप्तिमा भनिएको छ, ‘काठमाडौं प्रेस डटकममा १८ चैतमा ‘महँगो स्वास्थ्य सामग्री खरिदमा रक्षामन्त्री र प्रधानमन्त्रीका सल्लाहकारका छोराको संलग्नता’ शीर्षकमा प्रकाशित समाचार १९ चैतमा केही समयका लागि वेबसाइटबाट हटेको अनपेक्षित घटनाप्रति हामी माफी माग्न चाहन्छौँ ।’

सिरानले १८ चैतमा काठमाडौं प्रेसले विनासन्दर्भ आफ्नो भगिनी संस्था ईसेवालाई समेत जोडेर समाचार प्रकाशित गरेको र सो समाचार प्रकाशित भएपछि भाेलिपल्ट १९ चैतमा अनावश्यक रूपमा ईसेवालाई नजोड्न आग्रह गर्दै सम्पादक गोविन्द परियारसँग संवाद गरेको समेत विज्ञप्तिमा उल्लेख छ ।

सिरान टेक्नोलोजिजले २ वर्षअघि काठमाडौं प्रेसको वेबसाइट निर्माण गरेको थियो । वेबसाइटको कन्टेन्ट म्यानेजमेन्ट सिस्टम (सीएमएस) लगायतका प्राविधिक विषय सिरान टेक्नोलोजिजले हेर्दै आएको विज्ञप्तिमा उल्लेख छ ।