विराटनगर । मोरङको कानेपोखरी गाउँपालिकाकी अध्यक्ष राजमति इङ्गनामले सार्वजानिक विदाको दिन सरकारी गाडी दुरूपयोग गरेको भन्दै स्थानीयले विरोध गरेका छन् ।
सार्वजानिक विदाको दिन सरकारी गाडी व्यक्तिगत प्रयोजनमा प्रयोग गरेको भन्दै स्थानीय गाउँपालिकाको मुख्य गेटमा मंगलबार हस्ताक्षर अभियान संकलन गरेर विरोध गरेका हुन् ।
उनीहरूले भ्रष्ट जनप्रतिनिधी गाडीमा, जनता सबै खाडीमा, सार्वजानिक विदाको दिन कानेपोखरी गाउँपालिकाको गाडी खोई ? लगायतको ब्यानरमा हस्ताक्षर कार्यक्रम सुरु गरेका छन् । उनीहरुले गाउँपालिकाको प्रवेशको मुख्य गेटमा ब्यानर टागेर जनताको हस्ताक्षर संकलन गरे । हस्ताक्षर संकलन गरेको ब्यानर गाउँपालिका उपाध्यक्ष भोला अधिकारीलाई बुझाउने स्थानीय नविन पौडेलले बताए ।
सोमबार अन्तर्राष्ट्रिय श्रमिक दिवसको दिन गाउँपालिका अध्यक्ष इङ्गनाम व्यक्तिगत कामले तेह्रथुम गएको बुझिएको छ । यस विषयमा बुझन खोज्दा गाउँपालिका अध्यक्ष इङ्गनामले फोन उठाइनन् ।