विराटनगर । आगामी मङ्सिर ४ गते हुने निर्वाचनमा मजदुर नेता उपेन्द्र कुमार रायले मोरङको क्षेत्र नं. ६ को (क) मा उम्मेदवारी दिने भएका छन् । नेकपा माओवादी केन्द्रबाट रायले उम्मेदवारी दिने भएका हुन् ।

विद्यार्थी सङ्गठनबाट राजनीतिमा होमिएका राय २०५५ सालबाट माओवादीमा सङ्गठित भई निरन्तर पार्टीको संस्थापन पक्षमै रही हाल नेपाल कम्युनिस्ट पार्टी माओवादी केन्द्रको प्रदेश कमिटी सचिवालय सदस्य तथा गैर भौगोलिक जिल्ला समिति सह इन्चार्जको जिम्मेवारीमा रहेका छन् । २०६२-२०६३ को जनआन्दोलन सँगै मजदुर सङ्गठन र आन्दोलनको नेतृत्व गर्दै आइरहेकोले पार्टीले यस पटकको निर्वाचनमा टिकट दिने उनले बताए ।

क्षेत्र नम्बर ६ मा मोरङको दक्षिणी भेग अर्थात् भारतीय सिमानासँग जोडिएका नगरपालिका र गाउँपालिकाका वडाहरू पर्छन् । क्षेत्र नम्बर ६ मा बुढीगंगा गाउँपालिका, सुन्दरहरैंचाको २ र ७ वडा र विराटनगरको ४, ७, ९ र ११ नम्बर वडा कायम गरिएको छ । यस क्षेत्रमा १ लाख ५६ हजार ९ सय ८६ जनसङ्ख्या छ ।

यो क्षेत्रमा मजदुर, किसान, आदिवासी,मधेसी समुदायहरूको राम्रो पकड छ । त्यसैले पनि लामो समय मजदुर क्षेत्रमै काम गरेको हुनाले आफूलाई पार्टीले टिकट दिए जित्ने सम्भावना धेरै रहेको उनले बताए ।