युक्रेनलाई लिएर बढ्दो तनावका बीच रुसले ब्यालिस्टिक मिसाइलसँगै रणनीतिक सैन्य अभ्यास सुरु गरेको दाबी त्यहाँको समाचार एजेन्सी आरआउए नोभोस्टीले गरेको छ । क्रेमलिनका प्रवक्ता दिमित्री पेस्कोभको भनाइ उद्धृत गर्दै समाचार एजेन्सीले यस्तो दाबी गरेको हो ।

केही दिनयता रुस र युक्रेनबीचको तनावलाई लिएर फरकफरक समाचारहरु आइरहेका छन् । रुसले आफ्नो सैनिक फिर्ता बोलाएको दाबी गरिरहेको छ । उता अमेरिकाले यो विषयमा रुसको भरोसा गर्न नहुनेमा जोड दिइरहेको छ ।

यसअघि अन्तर्राष्ट्रिय समाचार एजेन्सीको दाबीअनुसार शनिबार रुसका सबै सामरिक शक्तिले गर्ने सैन्य अभ्यास राष्ट्रपति भ्लादिमीर पुटिनले निगरानी गर्नेछन् ।

अर्कोतिर अमेरिका, नाटो देश र पश्चिमी मुलुक रुसले युक्रेनमाथि आक्रमण गर्न लागेको शंका जाहेर गरिरहेका छन् । यस्तोमा पूर्वी युक्रेनको स्थिति तनावपूर्ण रहेको बीबीसीले उल्लेख गरेको छ । अशान्त क्षेत्रमा बमबारीको समेत खबर आइरहेका छन् ।