मोरङमा ‘लकडाउन’ उल्लंघन गर्ने साढे १२ सय सवारीसाधनलाई कारबाही गरेको छ । विभिन्न बहाना बनाएर बिनाकारण सडकमा निस्किएका सर्वसाधारण र सवारीधनीलाई कारबाही गरिएको हो । ‘लकडाउन’ उल्लंघन गरेको भन्दै प्रहरीले शुक्रबार विहानसम्म मोरङबाट ६ जनालाई नियन्त्रणमा लिएर कारवाहीसमेत गरेको छ ।

बिहीबार मात्र प्रहरीले विराटनगर महानगरपालिकामा सयौंको संख्यामा सवारीसाधनलाई कारबाही गरेको थियो । ‘लकडाउन’को समयमा सडकमा सवारीसाधनसहित निस्किएका ब्यक्तिहरुलाई प्रहरीले सोधपुछ गर्ने र निस्किनुको उचित कारण नदेखिएकालाई कारवाही गर्ने गरेको वडा प्रहरी कार्यालय (क) विराटनगरका प्रहरी निरिक्षक विज्ञान बस्नेतले बताए ।

विराटनगरस्थित कोशी राजमार्गको भट्ठीमोड, बरगाछी, कंचनवाडी, आयल निगमसहित मुख्य सडकको बुधहाटचोक र वडा प्रहरी कार्यालय सामुन्नेको सडकमा प्रहरीले चेकपोष्ट राखेर सोधपुछ र चेकजाँच गर्ने गरेको छ ।

मोटरसाइकल, साइकल, रिक्सासहित बिनाकारण सडकमा निस्किएकालाई प्रहरीले सडक किनारमा घन्टौंसम्म उभ्याउने गरेको छ । यस्तै, वडा प्रहरी कार्यालय सामुन्ने नियन्त्रणमा लिइएकाहरुको सवारीसाधन साँझ ५ बजेसम्मका लागि वडा कार्यालयमा राख्ने गरिएको छ ।

प्रहरीको कारबाहीमा परेकाहरुले भने प्रहरीले दुःख दिएको भन्दै आ–आफ्नै तर्क राख्ने गरेका छन् । जहदा गाउँपालिका मझारेकी राधा साहले आवश्यक कामका लागि हिँड्दासमेत प्रहरीले दुःख दिएको गुनासो गरिन् । ‘लकडाउन’ उल्लंघन गरेको कसुरमा प्रहरीले बिहीबार साँझसम्म मोरङभरीबाट ११ सय ५७ सवारी साधनलाई कारवाही गरेको जनाएको छ ।

शुक्रबार बिहानसम्म कारवाहीमा परेका सवारीसाधनमा मोटरसाइकल ७ सय ६३, स्कुटी ५२, कार र भ्यान २३, ट्रयाक्टर १४, ट्रक २५, साइकल ३ सय ३०, सिटी तथा ट्याम्पो ४० गरी १२ सय ४७ वटा सवारी साधन र ६ जनालाई नियन्त्रणमा लिइएको हो । जिल्ला प्रहरी कार्यालय मोरङले जनाएको छ । कतिपयले ‘लकडाउन’लाई गम्भीरतापूर्वक नलिएकाले समस्या देखिएको मोरङ प्रहरी प्रमुख प्रहरी उपरिक्षक विश्व अधिकारीले बताए ।